VOV4.Bahnar - Kiơ̆ kơ Anih jang Mặt trận tổ quốc dêh char Dak Nông, truh đĭ ‘năr 12/4 rim tơ ring hlôi jang đang tơ drong iŏk nơ̆r tơ gop, đon lui đơ̆ng bơ ngai tăh hla tơ̆ anih oei sa hăm bơ ngai lĕch pơ jei pơm bơ ngai tang măt Kuôk hô̆i jăl 15 păng bơ ngai tang măt Jơ nŭm pơ gơ̆r kon pơ lei tơ̆ rim tơ ring, jăl jang 2021-2026.

Dôm Pano tơ roi tơ băt pôk rơ̆ih tơ̆ dêh char Dak Nông

Kiơ̆ pơ tôch đơ̆ng Anih jang Mặt trận tổ quốc rim apŭng, pơ lei tơm, 11 ‘nu lĕch pơ jei pơm bơ ngai tang măt Kuôk hô̆i jăl 15, 96 ‘nu bơ ngai tang măt Jơ nŭm pơ gơ̆r kon pơ lei dêh char jăl 4 păng dôm bơ ngai lĕch pơ jei pơm bơ ngai tang măt Jơ nŭm pơ gơ̆r kon pơ lei rim tơ ring jăl jang 2021-2026 tơ̆ dêh char Dak Nông tă kơ iŏk đei 100% đon lui đơ̆ng bơ ngai tăh hla tơ̆ anih oei sa. Dôm ‘măng iŏk nơ̆r tơ gop hơ len lăng, đon lui đơ̆ng bơ ngai tăh hla tơ̆ anih oei sa hlôi pơ gơ̆r ‘lơ̆ng, tơ păt, rơ đăh, vei sơ đơ̆ng ƀlep tơ drong hơ găt. Dang ei, rim apŭng, phường, xăh lơ̆m dêh char tŏk bŏk pơ jing păng pơ klep hơ năn, chih tơ băt dôm tơ drong hlôi bơ̆ jang, hŏk pơ hrăm đơ̆ng bơ ngai lĕch pơ jei tơ̆ anih oei sa păng rim hơ nih tăh kơ phiê̆u.  

Thuem: Tơ blơ̆