VOV4.Bahnar - ‘Năr 18/5, Anih tơm pơ gơ̆r khŭl linh dêh char Dak Nông hlôi pơ gơ̆r kôch iŏk 7 tŏ pơ sat linh lôch teh đak tơ̆ thôn 8, xăh Quảng Tân, apŭng Tuy Đức, dêh char Dak Nông. Lơ̆m kơ sô̆ 7 tŏ sat linh lôch teh đak đei iŏk akŏm, 3 tŏ pơ sat oei đei kơ ting, 4 tŏ pơ sat lăp oei pă tơ mam linh lôch dŏng teh đak nhen: koăl tăng, săng, ƀlak ao... Kiơ̆ kơ rim linh so hlôi iung tơ blăh tơ̆ tơ ring âu, ‘nâu jĭ kơ ting đơ̆ng dôm linh lôch dŏng teh đak găh Trung đoàn 205 păng Trung đoàn 271 (Anih tơm khŭl linh tơ ring hơ lĕch so) plang hơ kâu lôch lơ̆m dang sơ năm 1973-1974. Tơ ring tơ chă đei dôm pơ sat linh lôch dŏng teh đak âu hơ drol sơ̆ đei ƀô̆ đô̆i chă hơ năn ‘noh jĭ groi “ klăih song” yua kơ atŭm 1 groi kông mă linh bơ̆n păng ayăt iŏk tơ gar 1 păh 1 puăt. Tơ̆ tơ ring âu, sơ̆ khŭl linh kơ pal hlôi tơ chă đei 20 tŏ pơ sat linh lôch dŏng teh đak. Dang ei khŭl linh kơ pal hơ nơ̆ng pơ̆ih să tơ ring tơ chă.

Thuem: Tơ blơ̆