VOV4.Bahnar - ‘Năr 4/5, Dơ nŏ anih vei lăng kon pơ lei dêh char Dak Nông đei hla ar chih athei pơ dơ̆h 1,2 tơ drong jang, pơ vih pơ văn vă bơ̆ jang ‘lơ̆ng trong tang găn jĭ Covid-19. Kiơ̆ kơ ‘nŏh, đơ̆ng gơ măng 4/5, 1, 2 tơ drong jang pơ vih pơ văn ưh kơ kăl nhen tơ̆ anih et xa, hơ ri karaoke, hơ xoang, anih pơm ngôi điên tư hơ mơt tơ pŏh jĭ Covid-19 tơ̆ dêh char athei tang ‘măng pơ dơ̆h đĭ. 

Dơ nŏ anih vei lăng kon pơ lei dêh char athei dôm anih jang kơ pal, tơ ring tơ rang lê̆ pơ gơ̆r dôm tơ drong akŏm lơ bơ ngai mưh ưh kăl, jang kiơ̆ mă ‘lơ̆ng dôm tơ drong hơ găt tang găn jĭ. Dang ei Dak Nông tam mă đei 1 ‘nu bơ ngai yơ tơ pŏh jĭ Covid-19 păng rim tơ drong lơ̆m dêh char đei vei lăng sơ đơ̆ng ‘lơ̆ng. Jô̆ truh ‘năr 3/5, lơ̆m dêh char đei 31 ‘nu bơ ngai ăn oei hơ drô̆ vă hơ len năng. Tơ̆ Mondulkiri (Campuchia) đei trong sơ lam hơ dai hăm Dak Nông hlôi đei 3 ‘nu bơ ngai jĭ Covid-19 lơ̆m tơ pôl kơ na tôch hơ mơt tơ pŏh mât kiơ̆ ‘măng jang sơ lam dêh char tôch dêh.

Dơ̆ng: Tơ blơ̆