VOV4.Bahnar - ‘Năr brei (18/3), tơ̆ Hop akŏm mă hơ tuch, Jơ nŭm pơ gơ̆r kon pơ lei dêh char Dak Nông hơ len năng, tơ gop nơ̆r păng tơ chơ̆t ăn 9 hla ar chih tơ roi, tơ drong vă jang gĭt kăl. Lơ̆m nŏh, đei Tơ drong tơ chơ̆t găh pơ jing Anĭh jang kơ Khul bơ ngai tang măt Kuô̆k hô̆i păng Jơ nŭm pơ gơ̆r kon pơ lei dêh char Dak Nông ‘moi kiơ̆ tơ mât hơ dai 2 anĭh jang kơ Khul tang măt Kuô̆k hô̆i păng Anĭh jang kơ Jơ nŭm pơ gơ̆r kon pơ lei dêh char.

Hop akŏm mă hơ tuch kơ Jơ nŭm pơ gơ̆r kon pơ lei dêh char Dak Nông

Lơ̆m hop akŏm, dôm bơ ngai tang măt drơ̆ng nơ̆r hăm hla ar chih tơ roi đơ̆ng Dơ nŏ anĭh vei lăng kon pơ lei dêh char găh asong pơ dơ̆h jang hăm 2 'nu bơ ngai jang lơ̆m Dơ nŏ anĭh vei lăng kon pơ lei dêh char, 'nŏh jĭ ƀok Nguyễn Tấn Bi, Kơ dră chĕp kơ̆l Anĭh vei lăng jên hu dêh char păng ƀok Trần Văn Nam, Kơ dră chĕp kơ̆l Anĭh vei lăng tơ drong tơ roi tơ băt vă iŏk jang tơ drong jang nai dơ̆ng. Atŭm hăm 'nŏh pơ gơ̆r iŏk kơ phĭu rơih dơ̆ng 2 'nu bơ ngai jang lơ̆m Dơ nŏ anĭh vei lăng kon pơ lei dêh char hăm ƀok Hoàng Văn Thuần, pơm Kơ dră chĕp kơ̆l anĭh vei lăng jên hu dêh char păng ƀok Nguyễn Văn Hiệp, Kơ dră chĕp kơ̆l Anĭh vei lăng tơ mam drăm păng cham char.

Dơ̆ng: Tơ blơ̆