VOV4.Bahnar - ‘Năr 6/4, Anĭh vei lăng pôk rơih dêh char Dak Nông pơ gơ̆r hôp trư̆k tuyê̆n pơ tâp pơ hrăm 1,2 tơ drong jang găn pôk rơih bơ ngai tang măt Kuô̆k hô̆i jăl XV păng bơ ngai tang măt Jơ nŭm pơ gơ̆r kon pơ lei jơ̆p tơ ring đơ̆ng 2021-2026.

Anĭh vei lăng pôk rơih dêh char Dak Nông pơ gơ̆r hôp trư̆k tuyê̆n

Khei ‘năr âu ki, Anih jang đảng dêh char, Anih pơ gơ̆r pôk rơih dêh char Dak Nông, Jơ nŭm pơ gơ̆r kon pơ lei, Dơ nŏ anih vei lăng kon pơ lei, Anih MTTQVN dêh char păng Anih vei lăng pôk rơih dêh char tôch tơ rĕk truh tơ drong pơ tho tơ ƀôh, pơ gơ̆r bơ̆ jang dôm tơ drong hơ met ăn pôk rơih.

Truh dang ei, dêh char hlôi jang 'lơ̆ng dôm hơ yak hơ met ăn pôk rơih, pơm 'lơ̆ng trŏ tơ drong hơ găt đơ̆ng luơ̆t, pơ tho tơ ƀôh dôm nơ̆r pơ tho đơ̆ng anih jang kơ pal păng đei trong jang lăp hăm rim tơ ring. Dôm tơ drong mơ mat tat, tơ hlăk tăk mưh hơ met ăn pôk rơih hlôi đei dôm anĭh jang kơ Trung ương, tơ ring tơ rang pơ tho tơ ƀôh, hơ met pơ 'lơ̆ng.

Ƀok Trần Xuân Hải - Phŏ Kơ dră vei lăng kon pơ lei dêh char, Phŏ Kơ dră Anih vei lăng pôk rơih dêh char athei dôm bơ ngai tang măt vang truh hop akŏm roi tơ ƀôh mă tơ tom ăn anih jang đảng, khul kơ dră pơ gơ̆r tơ ring păng pơ tho ăn dôm khul vei lăng pôk rơih bơ̆ jang mă trŏ hăm tơ drong hơ găt đơ̆ng khôi luơ̆t.

Dơ̆ng: Tơ blơ̆