VOV4.Bahnar - ‘Năr 20/7, Anih pơ gơ̆r jang tang găn jĭ jăn tơ̆ bơ ngai dêh char Dak Nông hlôi pơ vang găn anih bơ̆ jang vei lăng kon pơ lei xăh Quảng Sơn, apŭng Đắk G’Long, yua đơ̆ng băt hơ dăh đei bơ ngai jĭ Covid-19 năm tơ̆ hơ nih âu bơ̆ jang. Mă hơ dăh ‘noh, iŏk đei kơ tơ̆ng ang đơ̆ng Anih vei lăng găh tơ drong jĭ jăn dêh char Dak Lak tơ roi găh 1 ‘nu ‘nao đei băt hơ dăh jĭ Covid-19 tơ̆ dêh char Dak Lak tơ roi tơ băt ‘năr 13/7 đei năm tơ̆ xăh Đức Xuyên, apŭng Krông Nô păng xăh Quảng Sơn apŭng Đắk G'Long, đei ngôi tơ jê̆ hăm 1,2 ‘nu.

Anih bơ̆ jang vei lăng kon pơ lei xăh Quảng Sơn, apŭng Đắk G'Long pơm kiơ̆ pơ vang găn ƀơ̆t đei bơ ngai jĭ Covid-19

Dêh char Dak Nông hlôi athei 2 xăh Đức Xuyên păng Quảng Sơn tơ tĕnh gơ var tơ ring, dăr hơ len, tơ chă, ăn oei hơ drô̆ kiơ̆ tơ drong hơ găt hăm dôm bơ ngai ƀơm truh, ngôi tơ jê̆. Dêh char hlôi athei pơ vang găn hloi anih bơ̆ jang vei lăng kon pơ lei xăh vă vei sơ đơ̆ng tơ drong jang tang găn jĭ, tơ tĕnh dăr hơ len, tơ chă dôm bơ ngai ngôi tơ jê̆, đei ƀơm truh yua đơ̆ng ‘năr 13/7, bơ ngai jĭ Covid-19 hlôi năm tơ̆ anih bơ̆ jang vei lăng kon pơ lei xăh Quảng Sơn pơ ma dơ nuh tơ drong jang.

Thuem: Tơ blơ̆