VOV4.Bahnar - Đơ̆ng rŏng kơ chă ƀôh lơ bơ ngai tơ pŏh vi rút SARS-CoV-2 lơ̆m tơ pôl tơ̆ xăh Quảng Tín, apŭng Đak R’lấp, Phŏ Kơ dră vei lăng kon pơ lei dêh char Dak Nông Tôn Thị Ngọc Hạnh kĭ hla ar tơ mât yoa dôm trong jang kăl vă tang găn jĭ Covid-19 tơ̆ tơ ring.

Kiơ̆ kơ ‘nŏh, dêh char Dak Nông tơ chơ̆t pơ vang găn jơ̆p apŭng Đak R’lấp đơ̆ng ‘năr 12 jơ 00’ ‘năr 7/9 păng tơ mât yoa dôm trong jang tang găn jĭ kiơ̆ tơ drong tơ chơ̆t 16. Athei kon pơ lei oei tơ̆ hnam, lăp lĕch tơ̆ ‘ngoăih mưh đei tơ drong kăl đĕch. Athei pơ dơ̆h đĭ rim tơ drong jang lơ̆m tơ pôl. Găn tôch ai bơ ngai hao gre kơ dâu vih vât, vei lăng ‘lơ̆ng ăn gre chơ tơ mam kơ dâu vih vât.

Kiơ̆ nơ̆r tơ roi đơ̆ng Anih pơ gơ̆r jang tang găn jĭ tơ̆ bơ ngai kơ apŭng Đak R’lấp, đơ̆ng ‘năr 5/9 đơ̆ng rŏng kơ ƀôh bơ ngai jĭ mă blŭng tơ̆ xăh Quảng Tín, truh pơ gê 7/9, lơ̆m apŭng đei 52 ‘nu bơ ngai tơ pŏh pơ rang jĭ SARS-CoV-2 lơ̆m nŏh akŏm tơ̆ 2 pơ lei Bu Dzách, Bu Bir găh xăh Quảng Tín. Dang ei anih jang pơ gang oei pơ gơ̆r dăr hơ len, tơ chă bơ ngai jĭ, set hơ len jĭ ăn hlŏh 6.200 ‘nu bơ ngai đei ƀơm truh, bơ ngai ngôi hơ dai hăm bơ ngai jĭ, vă ăn bơ ngai jĭ mât oei hơ drô̆, khăm hơ met jĭ.

Dơ̆ng: Tơ blơ̆