VOV4.Bahnar  – Năr 20/5, tơ̆ pơxat ƀlŏk tơbăt kơ apŭng Đăk R’Lấp (dêh char Đăk Nông), Anih pơgơ̆r khul linh dêh char, đe linh xo kơ Trung đoàn 271 atŭm hăm tang măt ăn 2 apŭng Đăk R'Lâ̆p păng Tuy Đức hlôi pơgơ̆r pơdong grong ƀŭ 9 kơting linh lôch tang ăn teh đak.

Đơ̆ng rŏng 3 năr, Anih pơgơ̆r khul linh dêh char Đăk Nông, đe khul linh xo atŭm hăm Anih pơgơ̆r khul linh apŭng Tuy Đức hlôi chơ chă păng xir akŏm đei 9 kơting linh lôch tang tơ̆ thôn 8, xăh Quảng Tân, apŭng Tuy Đức. Lơ̆m noh đei 3 tŏ pơxat oei tôm kơting hơkâu, dôm pơxat nai noh oei đei tơmam drăm đĕch nhen kơƀĭnh đak, tơlei kơmăi tơroit ơbăt, kơ 'lŏ bixilin, chơ hmŏk nhôm... Dôm hla bar chih răk ăn ƀôh đe linh lôch tang găn lơ̆m Trung đoàn 271 păng Trung đoàn 205 (Anih tơm tơring Hlĕch Pơbăh). 'Nâu jing 'măng chơ chă xir akŏm 'măng mă 4 tơ̆ tơring thôn 8, xăh Quảng Tân păng hlôi chă đei 29 kơting linh lôch tang. Tơ̆ jơ lêh, khul kơdră tơ̆ tơring, khul linh păng kon pơlei 2 apŭng Đăk R’Lấp păng Tuy Đức hlôi plang pơkăp, hlôt nhang ƀlŏk tơbăt păng hmach bơnê kơ jơhngơ̆m plang đơ̆ng đe linh lôch tang ăn teh đak.

Lan chih păng pơre nơ̆r