VOV4.Bahnar - Pơgê năr 16/4, Dơnŏ anĭh Mặt trận Tổ quốc Việt Nam dêh char Dak Nông pơgơ̆r Hop akŏm Pơma dơnŭh ‘măng mă 3 vă rơ̆ih iŏk, chĭh hơnăn dôm bơngai gơ̆h vă ăn pôk tơmơ̆t jang Kơdră tang măt Kuô̆k hô̆i jăl XV păng Kơdră tang măt Jơnŭm vei lăng kon pơlei dêh char Dak Nông jăl IV, jăl jang 2021-2026.

Dơnŏ anĭh Măt trân Tổ quốc dêh char Dak Nông pơgơ̆r hop akŏm pơma dơnŭh mă 3

Đơ̆ng rŏng pơma dơnŭh, 100% kơdră tang măt vang hop akŏm hlôi pơdrơ̆ng nơ̆r drơ̆ng kiơ̆ hơnăn dôm bơngai gơ̆h vă pôk tơmơ̆t jang Kơdra tang măt Kuô̆k hô̆i jăl XV ‘nŏh đei 10 ‘nu (lơ̆m au Trung ương tơ ƀô̆h 2 ‘nu bơngai, dêh char tơ ƀô̆h ăn 8 ‘nu) păng drơ̆ng nơ̆r ăn 3 ‘nu bơngai hlôi đei pơm hla bơar apĭnh lĕch ư̆h kơ chĭh hơnăn ăn pôk tơmơ̆t pơm kơdră tang măt Kuô̆k hô̆i jăl XV. Adoi, Hop akŏm jei hlôi pơm hla bơar chĭh hơnăn 88 ‘nu bơngai gơ̆h vă pôk tơmơ̆t pơm Kơdră tang măt Jơnŭm vei lăng kon pơlei dêh char Dak Nông jăl jang 2021-2026. Lơ̆m au, măt bơngai drŏ kăn vă pôk tơmơ̆t pơm kơdră tang măt ‘nŏh 38 ‘nu, bơngai kon kông 20 ‘nu, bơngai sơnăm mơlô̆h hlŏh ‘nŏh 31 ‘nu, bơngai ư̆h kơ đei mơ̆t lơ̆m khŭl Đảng ‘nŏh 9 ‘nu păng măt bơngai kơdră tang măt sơ̆ ăn pôk tơmơ̆t dơ̆ng ‘nŏh 21 ‘nu.

Tơblơ̆ nơ̆r: Amazưt