VOV4.Bahnar  – Ƀơ̆t tơbăt 131 xơnăm ‘Năr rơneh Ƀok Kơdră Hồ Chí Minh, pơgê năr 19/5, tơ̆ xăh Đak Nia, plei tơm Gia Nghĩa, Anih vei lăng kon pơlei dêh char Đăk Nông pơm lêh tơlĕch “Têt pơtăm ‘long ling lang ƀlŏk tơbăt kơ Ƀok Hô” păng pơtăm ‘long răh rai xơnăm 2021.

Tơ̆ lêh iung jang, khul kơpal dêh char Đăk Nông hơvơn rim kang ƀô̆, bơngai jang, khul linh păng kon pơlei pơtăm tŏ xĕt jat noh 1 tơm ‘long jơk, hăt hot vang pơtăm ‘long kiơ̆ nơ̆r pơtho đơ̆ng Ƀok vă vei xơđơ̆ng cham char, hơtŏk jơk tơring kơdrâ̆m. Đơ̆ng rŏng tơlĕch jang, 350 tơm yâu păng tơgiăr hlôi đei pơtăm tơ̆ Anih Choh jang xa kiơ̆ trong ‘nao, xăh Đăk Nia, plei tơm Gia nghĩa. Lơ̆m ‘măng âu, rim tơring lơ̆m dêh char duh iung pơtăm pơhlom 51.000 tơm ‘long jơk. Ƀok Lê Trọng Yên, Phŏ Kơdră Anih vei lăng kon pơlei dêh char Đăk Nông ăn tơbăt, tơ̆ dêh char Đăk Nông, mŭk drăm bri roi năr roi tơjruh găh kơsô̆ păng hơgăt tơdrong ‘lơ̆ng. Anih vei lăng kon pơlei dêh char ‘meh vă dôm anih jang, jơnŭm tơpôl păng kon pơlei băt chă vei lăng cham char, hăt hot pơtăm tơm ‘long jơk, vei lăng bri, hơtŏk pơ ‘lơ̆ng cham char erih xa.

Lan chih păng pơre nơ̆r