VOV4.Bahnar - Năr brei, năr 30/6, Jơnŭm vei lăng kon pơlei dêh char Dak Nông jăl IV (jăl jang 2021-2026) hlôi pơgơ̆r hop akŏm mă blŭng pôk tơmơ̆t rim kơchư̆k tơm dơnơm găh tơdrong gơ̆h tơchơ̆t đơ̆ng Jơnŭm vei lăng kon pơlei dêh char. Tơ̆ Hop akŏm, Dơnŏ anĭh pôk rơ̆ih dêh char Dak Nông hlôi tơroi tơbăt pơtôch pôk rơ̆ih păng sơkơ̆t hơdăh hơnăp bơ̆ jang kơ 52 ‘nu kơdră tang măt hlôi đei pôk tơmơ̆t jang lơ̆m Jơnŭm vei lăng kon pơlei dêh char jăl IV, jăl jang 2021-2026.

Rim kơdră tang măt hlôi tăh hla pôk tơmơ̆t rim kơchư̆k Kơdră chĕp pơgơ̆r, Kơ iĕng kơdră chĕp pơgơ̆r Jơnŭm vei lăng kon pơlei dêh char păng Kơdră chĕp pơgơ̆r, Kơ iĕng kơdră chĕp pơgơ̆r Dơnŏ anĭh vei lăng kon pơlei dêh char. Pơtôch tăh hla, ƀok Lưu Văn Trung, Kơ iĕng Kơdră chĕp pơgơ̆r Đảng dêh char, đei pôk tơmơ̆t pơm Kơdră chĕp pơgơ̆r Jơnŭm vei lăng kon pơlei dêh char jăl IV, jăl jang 2021-2026. Ƀok Y Quang B.krông hăm yă Mai Thị Xuân Trung, hơnơ̆ng đei pôk tơmơ̆t jang dơ̆ng Kơ iĕng Kơdră chĕp pơgơ̆r Jơnŭm vei lăng kon pơlei dêh char. Hăm rim kơchư̆k kơ Dơnŏ anĭh vei lăng kon pơlei dêh char, ƀok Hồ Văn Mười, Kơ iĕng kơdră chĕp pơgơ̆r Đảng dêh char, Kơdră chĕp pơgơ̆r Kŏng ang dêh char đei pôk tơmơ̆t jang Kơdră chĕp pơgơ̆r Dơnŏ anĭh vei lăng kon pơlei dêh char. Ƀok Lê Trọng Yên, yă Tôn Thị Ngọc Hạnh hơnơ̆ng đei pôk tơmơ̆t dơ̆ng jang Kơ iĕng kơdră chĕp pơgơ̆r Dơnŏ anĭh vei lăng kon pơlei dêh char. Bơngai ‘nao pơm Kơ iĕng Kơdră chĕp pơgơ̆r Dơnŏ anĭh vei lăng kon pơlei dêh char ‘nŏh ƀok Lê Văn Chiến (sơ̆ jang Chánh Văn phòng Dơnŏ anĭh Đảng dêh char).

Tơblơ̆ nơ̆r: Amazưt