VOV4.Bahnar – Năr 14/6, Jơnŭm pơgơ̆r tang găn păng tơjră pơrang jĭ tơ̆ kon bơngai dêh char Đăk Nông pơtruh nơ̆r pơkăp Anih jang kơpal, Anih vei lăng kon pơlei dêh char Đăk Nông hơlen tơjur minh ƀar pơkăp trong tang găn păng tơjră jĭ Covid-19 vă pơm kiơ̆ pơkăp jang hadoi tang găn păng tơjră răh pơrang jĭ, hơtŏk tơ iung răh mŭk drăm tơpôl.

          Kiơ̆ kơ noh dêh char Đăk Nông gô hơlen axong pơih pơm jang dơ̆ng hăm gre chơ tơmoi vih vơ̆t hăm dôm dêh char tam mă hơbuh pơrang dăh mă hơbuh pơrang mă lei hlôi hloh 14 năr ưh đei bơngai 'nao ƀơm jĭ. Dôm anih jang tĕch pơdro, tĕch tơmam et xa 'nâu nai đei axong pơm jang mă lei athei pơm kiơ̆ ƀlep dôm pơkăp tang găn păng tơjră pơrang jĭ, tơdrong pơxĭt pơkong grong ƀŭ ưh gơh akŏm hloh 30 'nu. Mă lei, dêh char Đăk Nông pơkăl dôm tơring athei hơlen kơjăp pơrang jĭ lơ̆m tơring, hơmet tôm tơdrong kăl, vă tơjră hăm dôm tơdrong lang xă đơ̆ng pơrang jĭ, atŭm hăm noh, pơkăl kon pơlei pơtoi pơm kiơ̆ kơjăp pơkăp 5K đơ̆ng Anih tơm Y tê̆.

Lan chih păng pơre nơ̆r