VOV4.Bahnar - Năr 21/4, Dơnŏ anĭh vei lăng Pôk rơ̆ih dêh char Dak Nông hlôi pơgơ̆r hop akŏm ‘măng mă 3 vă lăng hơlen tơdrong jang hơmet ăn pôk rơ̆ih kơdră tang măt Kuô̆k hô̆i jăl XV păng Kơdră tang măt Jơnŭm vei lăng kon pơlei jăl jang 2021-2026. 

Rup hop akŏm

Kiơ̆ đơ̆ng Dơnŏ anĭh vei lăng Pôk rơ̆ih dêh char Dak Nông, trŭh dang ei rim tơring hlôi tơlĕch bơ̆ jang pôk rơ̆ih ƀlep tơdrong tơchơ̆t kơ Khôi luơ̆t. Dơnŏ anĭh Măt trân rim hơnĭh hlôi pơgơ̆r hop akŏm ‘măng mă 3, pơm hla bơar chĭh hơnăn dôm bơngai đei ăn pôk tơmơ̆t ƀlep kiơ̆ pơkă. ‘Moi kiơ̆ pơtôch hop akŏm pơma dơnŭh, lơ̆m dêh char đei 10 ‘nu bơngai vă pôk tơmơ̆t pơm kơdră tang măt Kuô̆k hô̆i jăl XV; Jơnŭm vei lăng kon pơlei dêh char đei 88 ‘nu bơngai; Jơnŭm vei lăng kon pơlei apŭng đei 452 ‘nu; Jơnŭm vei lăng kon pơlei tơring đei 2.960 ‘nu. 680 Khŭl pôk rơ̆ih lơ̆m dêh char hlôi iung jang pơklep hla bơar chĭh hơnăn bơngai tăh hla tơ̆ rim hơnĭh tăh hla hăm akŏp đei 410.659 ‘nu bơngai tăh hla. Tơ̆ hop akŏm, Dơnŏ anĭh vei lăng Pôk rơ̆ih dêh char Dak Nông hlôi drơ̆ng nơ̆r hăm hơnăn rim bơngai vă pôk tơmơ̆t pơm Kơdră tang măt Kuô̆k hôi jăl XV păng Kơdră tang măt jơnŭm vei lăng kon pơlei jăl jang 2021 -2026 vă klăh asong ăn rim hơnĭh pôk rơ̆ih. 

Tơblơ̆ nơ̆r: Amazưt