VOV4.Bahnar - Tŏk bŏk lơ̆m pơyan tŏ phang pơđang, tơdrong iŏk yua ŭnh hơyŭh rim năr lơ̆m dêh char Dak Nông tŏk lơ hlŏh pơtêng hăm năr hmă, ‘nŏh dang 2 trĭu kWh păng pơtrŭh ăn trŭh 100MW.

Sơđơ̆ng pơtrŭh ŭnh hơyŭh măh mai, hơnơ̆ng, Kŏng ty ŭnh hơyŭh Dak Nông hlôi pơrô̆ athei rim hơnĭh bơ̆ jang gak 24/24 jơ, ăn dơ̆ng dôm bơngai bơ̆ jang tơ̆ dôm hơnĭh hơmơt đei tơdrong sar bar kơtang. Adoi atŏk kơtang ming hơmet, tơplĭh ‘nao dôm kmăi kmŏk, tơlei ŭnh hơyŭh tơ̆ rim pơlei pơla; chong chŏh pơ ‘ngoăih jĭh trong tơlei, tơpơlĭh aptomat… tang găn hơlau, ư̆h kơ lê̆ đei tơdrong răm au to. Rim tơring pơjing trong jang pơtrŭh ŭnh hơyŭh sơđơ̆ng, tơlĕch jang rim tram 110 kV, rim hnam kmăi đak tơlĕch ŭnh hơyŭh iĕ iung jang tơplĭh trong pơtrŭh ŭnh hơyŭh ‘moi kiơ̆ rim tơlei ŭnh hơyŭh păh ai năm tơ̆ pơlei pơla. ‘Ngoăih kơ ‘nŏh, Hnam kmăi ŭnh hơyŭh Dak Nông jei pơkă athei kon pơlei pơm kiơ̆ ƀlep tơdrong pơkom ŭnh hơyŭh nhen: tơpĭt đĭ đăng ŭnh hơyŭh tơdăh ưh kơ yua, ‘nĕ gan plôih kmăi pơm rơngơp.

Tơblơ̆ nơ̆r: Amazưt