VOV4.Bahnar - Tơ̆ hơ năp tơ drong jĭ Covid -19 tŏk bŏk đei ƀôh krê hơ mơt tơ̆  Campuchia, Ƀô̆ đô̆i vei lăng tơ ring sơ lam dêh char Dak Nông păng rim khŭl linh kơ pal hlôi hơ tŏk loi dơ̆ng lơ trong jang kăl, vei lăng tơ ring sơ lam, ư̆h kơ lê̆ đei ƀôh tơ drong năm mơ̆t, kơ dâu klĕng klĕnh glăi pơm tơ poh lang să jĭ hơ buh.

Dêh char Dak Nông đei trong sơ lam kơ jung 141km tơ til hăm dêh char Mondulkiri (Campuchia), hơ nih hlôi đei dôm bơ ngai jĭ Covid-19 tơ poh jĭ lơ̆m tơ pôl. Đại tá Phan Quý Vỹ, Phŏ Chính ủy Anih tơm pơ gơ̆r Ƀô̆ đô̆i vei lăng tơ ring sơ lam dêh char Dak Nông tơ băt, tơ̆ hơ năp đei ƀôh krê hơ mơt đơ̆ng jĭ Covid-19 tơ̆ Campuchia, pă jor gô đei tơ drong bơ ngai Việt Nam đơ̆ng păh to kơ dâu klĕnh brŏk tơ̆ teh đak vă veh ver kơ jĭ. Yua thoi noh, Anih tơm pơ gơ̆r ƀô̆ đô̆i vei lăng tơ ring sơ lam dêh char athei kang ƀô̆, khŭl linh 12 kơ đông linh vei lăng tơ ring sơ lam ư̆h kơ gơ̆h pơ hơi, hơ tŏk kơ tang hloh dơ̆ng tơ drong jang dăr joang vei lăng kơ hret tơ ring ‘măng jang sơ lam, trong iĕ, trong pơ̆ih.

 “Vă tơ tom tang găn jĭ hơ buh, Ƀô̆ đô̆i vei lăng tơ ring sơ lam hlôi tơ lĕch jang 25 grŭp, hơ nih găn dơ nơ̆ng tơ̆ tơ ring sơ lam hăm khŭl linh tang găn jĭ hơ nơ̆ng dăr joang, vei lăng rim trong iĕ, rim tơ ring tơm hơ mơt kơ đei ƀôh kơ dâu klĕnh păng mơ̆t ôn. Nhôn hlôi bơ̆ jang kiơ̆ tơ păt tơ drong tơ chơ̆t đơ̆ng kơ dră kơ pal, đơ̆ng Anih tơm vei lăng khŭl linh păng Anih vei lăng kon pơ lei dêh char găh tơ drong jang tang găn jĭ Covid-19, ư̆h kơ lê̆ bơ ngai oei tơ̆ teh đak đe kơ dâu klĕnh mơ̆t lơ̆m tơ ring. Hơ dai hăm ‘noh nhôn jang ‘lơ̆ng tơ drong jang tơ roi tơ băt, krao hơ vơn tơ pôl kon pơ lei jang kiơ̆ ‘lơ̆ng tơ drong jang tang găn jĭ păng vang jang tơ drong jang chă ƀôh dôm tơ drong pơm glăi kŭm nhen dôm tơ drong năm mơ̆t đơ̆ng teh đak đe, kơ dâu klĕnh glăi brŏk tơ̆ teh đak vă tơ tom sek phak”.

Kơ dră chĕp kơ̆l dêh char Dak Nông năm hơ len lăng tơ drong jang vei lăng tang găn jĭ Covid-19 tơ̆ trong sơ lam

Kŭm hăm pơ vei đĭ đăng kơ sô̆ linh tơ̆ rim kơ đông linh vei lăng tơ ring sơ lam. Anih tơm pơ gơ̆r Ƀô̆ đô̆i vei lăng tơ ring sơ lam dêh char Dak Nông hlôi athei Anih tơm pơ gơ̆r khŭl linh dêh char ăn dơ̆ng kang ƀô̆, khŭl linh găh rim Đại đội linh tơ blăh tơ̆ kông pơm hơ nih linh oei tơ̆ trong sơ lam pơ yua ăn tơ drong jang tang găn jĭ. Hơ dai hăm ‘noh athei rim xăh sơ lam hơ tŏk loi dơ̆ng Tiểu đội linh kon pơ lei bơ̆ jang ăn rim hơ nih jang tang găn jĭ Covid – 19.

Kŭm hăm khŭl linh, anih jang pơ gang dêh char Dak Nông kŭm hlôi ăn kang ƀô̆ tơ̆ rim hơ nih găn tơ ring sơ lam hăm trong jang tơm “ tang găn ‘lơ̆ng, chă ƀôh hrôih, ăn oei hơ drô̆ hrĕnh, hơ met đei yua, hơ met pơ ‘lơ̆ng mă keh đang, tơ tĕnh sơ đơ̆ng tơ drong”. Ƀok Hà Văn Hùng-Phŏ Kơ dră chĕp kơ̆l Anih vei lăng găh jang pơ gang dêh char Dak Nông tơ băt, dang ei đei 100 y ƀak si tơ plih băl bơ̆ jang kŭm hăm kang ƀô̆, khŭl linh vei lăng tơ ring sơ lam, tang găn jĭ mơ̆t tơ poh lơ̆m teh đak. Đĭ đăng dôm bơ ngai mơ̆t lĕch lơ̆m tơ ring sơ lam mư̆h đei chă ƀôh adoi đei khŭl linh kơ pal ăn năm oei hơ drô̆ kiơ̆ ƀlep tơ drong hơ găt.

 “Dêh char Dak Nông dang ei oei tam mă đei bơ ngai hơ yơ đei tơ poh jĭ ră, mă lei nhôn ư̆h kơ gơ̆h pơm pơ hơi, rim anih jang oei athei hơ nơ̆ng năm hơ len lăng, pơ gơ̆r bơ̆ jang kiơ̆ lơ trong jang tang găn jĭ tơ păt. Anih jang pơ gang hlôi jang hơ dai hăm rim anih jang tơ lĕch jang tơ păt akŏm tang găn tơ drong năm mơ̆t đơ̆ng dôm bơ ngai đei hơ mơt đơ̆ng Campuchia brŏk. Dang ei đei dang 200 ‘nu ‘noh đei bơ ngai jang pơ gang păng linh vei lăng tơ ring sơ lam hơ nơ̆ng bơ̆ jang prăt năr prăt măng tơ̆ dôm hơ nih găn ư̆h kơ ăn dôm bơ ngai năm mơ̆t. Khŭl linh joăt jang ki thuơ̆t, nhôn iŏk tơ̆ rim tơ ring, pơ tih gia dôm hơ nih răp găn tơ̆ apŭng Cư Jút ‘noh gô iŏk khŭl jang pơ gang Cư Jút,tơ dăh oei tơ̆ apŭng Đắk Mil ‘noh iŏk khŭl jang pơ gang Đắk Mil, oei tơ̆ 2 ‘măng jang sơ lam nhôn ăn khŭl jang Anih vei lăng tơ drong jĭ jăn dêh char năm tơ gŭm.”

Khŭl linh vei lăng tơ ring sơ lam Dak Nông vei lăng tơ̆ rim trong iĕ, trong pơ̆ih tơ̆ tơ ring sơ lam

Hơ drol ‘noh, dêh char Dak Nông hlôi tơ lĕch hla ar athei rim anih jang, rim khŭl, grŭp tơ pôl, rim anih jang khŭl linh ƀô̆ đô̆i, rim tơ ring ư̆h kơ gơh pơm pơ hơi lơ̆m tơ drong jang tang găn jĭ hơ buh; tang găn pơ gơ̆r lơ tơ drong jang, akŏm lơ bơ ngai ư̆h kơ kăl. Hơ dai hăm ‘noh athei bơ̆ jang kiơ̆ tơ păt rim trong jang vei sơ đơ̆ng, pơm kiơ̆ gom muh măt, ôp ti rơ goh... kiơ̆ ƀlep tơ drong hơ găt. Rim khŭl linh kơ pal vei lăng kơ hret tơ drong mơ̆t đơ̆ng teh đak đe, ăn oei hơ drô̆, răp hơ len lăng y tế; hơ dai hăm ‘noh hơ met ăn rim tơ drong kăl vă pơ̆ih să bơ ngai mơ̆t tơ̆ teh đak bơ̆n lăp hăm tơ drong jĭ hơbuh kiơ̆ lơ̆m jơ hngơ̆m đon hơ tŏk tơ iung mă lei athei vei sơ đơ̆ng ‘lơ̆ng.

Tuấn Anh: Chih

Thuem: Tơ blơ̆