VOV4.Bahnar - Pơ gê ‘năr (28/3), Dơ no\ an^h vei lăng kon pơ lei dêh char Dak Nông pơ gơ\r Hop ako\m tơ le\ch tơ drong jang hơ dai pơm hơ to\k kơ jă tơ mam đơ\ng tiu tơ\ apu\ng Dak Song.

Hop ako\m jang hơ dai ato\k tơ iung tiu Dak Song

Hrei ‘nâu lơ\m dêh char đei hlo\h 27.500 ha tiu, to\k hlo\h 4 ‘măng pơ têng hăm kơ so# hơ găt. Đ^ đăng pơ gar tiu yoa kon pơ lei ơng tơ đăh pơ tăm kơ dih ngăl, đei bơ ngai săy pho\ng lơ, tơ ruih đak ưh kơ tro\, hơ dai hăm hơ yuh to\ ‘mi kial tơ plih kơ na đei dang 500 ha tiu răm kơ pơ rang j^ phă, lôch kro.

‘Nâu j^ ‘măng mă blu\ng Dơ no\ an^h vei lăng kon pơ lei dêh char Dak Nông pơ gơ\r hop ako\m hăm kơ hre\ng ‘nu bơ ngai pơ tăm, an^h te\ch mơ dro păng dôm an^h jang kơ pal đei măt, chă pơ ma truh dôm tơ drong vă jang hơ dai vă pơm hơ to\k kơ jă tơ mam tiu tơ\ tơ ring lơ\m khei ‘năr truh. Kiơ\ đơ\ng no\h, dar de\h pơm tơ plih đon hlôh vao đơ\ng kon pơ lei pơ tăm, athei jang kiơ\ trong ato\k tơ iung tiu pran kơ jăp, pơm hơ to\k kơ jă tơ mam păng kơ sư\k pơ jei tơ\ an^h te\ch mơ dro.

Dơ\ng: Tơ blơ\