Dêh char Đăk Lăk tŏk bŏk pơtơm ming man 3 hnam trưng hŏk teh đak rong 'me dôm jăl hŏk tơ̆ tơring sơlam Ia R’vê, Ia Lốp păng Buôn Đôn hăm kơsô̆ jên asong 390 tih hlj, asong ăn jê̆ 3.300 hŏk tro Jăl kơđeh păng Trŭng hŏk kơ sơ hŏk pơhrăm. Rim hnam trưng athei keh đang tơmơ̆t yua lơ̆m khei 8 sơnăm ou. Ƀok Võ Văn Lợi, Phŏ Kơdră Jơnŭm vei lăng tơdrong jang Ming man dêh char Đăk Lăk ăn tơbăt, hơnih iŏk ming man tŏk bŏk oei hơlen lăng dôm tơdrong pơtho đơ̆ng Hơnih tơm jang Ming man vă tơgŭm pơklaih tơnap tap ăn hơnih iŏk ming man.

Mă oei ƀơm lơ tơnap tap gah tŏ 'mi kial, tơmam drăm păng bơngai jang ming man, rim hơnih iŏk ming man tŏk bŏk oei hơdrin jang hơdoi vă pơklaih tơhlăk tăk, hơtŏk tenh tơdrong ming man vă dôm hnam trưng hŏk teh đak rong 'me tơ̆ tơring sơlam dah hrôih tơmơ̆t yua, pơtrŏ hăm tơdrong kăl hŏk pơhrăm kơ đe hŏk tro tơring sơlam teh.