Truh dang ei, đĭ đăng anih jang đơ̆ng dêh char truh tơ̆ xăh tơ̆ Lâm Đồng đei chô̆ mang hăm kơmăy jang ngăl; hla ar điên tư, chư kĭ kơsô̆ đei iŏk yoa sơđơ̆ng, hăm hlŏh 93% chư kĭ kơsô̆. Tơ̆ trang pơvih pơvăn ăn tơpôl, vă jê̆ 92% hla ar đei pơm trư̆k tuyê̆n; kơsô̆ hla ar pơm đang trŏ jơnăr hơgăt loi 97%, tơdrong chih hơlen, pơm hla ar kiơ̆ kơsô̆ ‘măn răk loi 95%.

Kiơ̆ ƀok Lê Thanh Liêm, Phŏ Kơdră Anih vei lăng jang Khoa hŏk păng kơmăy kơmŏk dêh char Lâm Đồng, tơdrong pơtho tơƀôh trong iŏk yoa kơmăy sô̆ hlôi tơgŭm pơtruh tôm tơdrong đei chih răk đơ̆ng dêh char truh tơ̆ xă, tơjur ƀiơ̆ hla ar, jơnăr pơm. Mă lei, tơring kŭm oei tơƀâp pơmat tat yoa kơsô̆ chih jô̆ tam mă akŏm 1 ƀôt, tam mă hơmet ‘lơ̆ng păng ưh kơmăh bơngai jang găh kơmăy roi tơbăt tơ̆ xăh. Tơ̆ hơnăp kơnh, Anih vei lăng khoa hŏk păng kơmăy kơmok Lâm Đồng vă akŏm jơhngâm chih pơjing kơsô̆ yoa atum, hơtŏk tơdrong đei yoa đơ̆ng Anih pơgơ̆r jang rơgei păng atŏk tơiung khul bơngai jang kơmăy sô̆ tơ̆ tơring.