Chơt hơ-iă tơƀơ̆p pơma dơnuh hăm đe đô̆i viên rơgei, Tổng Bí Thư, Kơdră teh đak bơ̆n Tô Lâm tơbăt dơ̆ng đunh kơ ou 85 sơnăm, lơ̆m khei năr tơnap tap kơ kăch mang, Đô̆i Thiê̆u niên Tiên phong Hồ Chí Minh đei tơ-iung pơjing păng jing bơbŭng hnam 'mêm kơ-eng ăn đe hơ-ioh Việt Nam, lơ bơngai gơh hơgei lơ̆m khei năr tơblah vang sơ̆ nhen Kim Đồng, Lê Văn Tám, Kpă-Kơlơng păng lơ hơ-ioh nuih mơng nai hlôi pơm hơdah đon bơnôh “sơnăm iĕ đon tih”.

Tổng Bí thư, Kơdră teh đak bơ̆n Tô Lâm ră hơdah 5 tơdrong Ƀok Hô pơtho jing tơdrong kăp gĭt vă đe mon hŏk pơhrăm păng tih vơ̆ djơ̆ 'lơ̆ng. Tơroi gah pơkăp jang truh sơnăm 2045, tơbăt 100 sơnăm tơ-iung pơjing teh đak, Việt Nam jing teh đak hơtŏk tơ-iung đei yua lơ, Tổng Bí thư, Kơdră teh đak bơ̆n akhan, lơ hơ-ioh 'năr ou gô oei lơ̆m sơnăm tơgop tơnăp hloh, kơtă tơ-iung pơjing, vei lăng păng hơtŏk teh đak.