VOV4.Bahnar - Âu ki, ŭnh điên Dak Nông hlôi tơ tĕnh hơ met ‘lơ̆ng 2 tơ drong sar bar tơ̆ trong tơ ley ŭnh điên, vei sơ đơ̆ng pơ yua ăn tơ moi. Mă hơ dăh ‘noh, ƀơ̆t ‘năr dơ̆ng ‘năr 10/5, kial hơ bŭt hlôi pơm tơ păr pơ bŭng hnam kon pơ lei păng ‘long tơ̆ gơ̆ păk lơ̆m trong tơ ley ŭnh điên, pơm ăn ư̆h kơ đei ŭnh điên tơ̆ xăh Nhân Đạo, huyện Đăk R’Lấp. Iŏk đei tơ roi, kŏng nhân jang ŭnh điên Đăk R’Lấp hlôi ăn gre vŏk kŭm hăm dôm tơ mam kơ măy kơ mŏk năm tơ̆ hơ nih âu hơ met pơ ‘lơ̆ng sar bar, pơ truh dơ̆ng ŭnh điên ăn kon pơ lei ƀơ̆t 3 jơ kơ sơ̆ năr au hloi.

Gre tih dui kơ tĕch trong tơ ley păng păng tơ gơ̆ jrăng ŭnh điên tơ̆ Đăk Song

Hơ drol ‘noh, ƀơ̆t 10 jơ pơ gê ‘năr 4/5, tơ̆ trong năm vih vơ̆t 2 apŭng Đăk Song – Tuy Đức, 1 tong gre tih chơ lơ dêh hnang hlôi tơ vŏk lơ̆m trong tơ ley ŭnh điên hạ thế pơm kơ tĕch tơ ley, tơ gơ̆ jrăng ŭnh điên păng jrăng biến áp T70 hơ grêng hloi. Tơ drong sar bar pơm ăn tơ drong pơ truh ŭnh điên ăn kơ hloh 5.200 ‘nu tơ moi đei ƀơm ư̆h kơ ‘lơ̆ng. Yua thoi noh, Ŭnh điên Đăk Song athei akŏm pơ đĭ bơ ngai jang, gre vă tơ tĕnh hơ met ming. Truh 1 jơ kơ sơ̆ năr âu mơ̆n, kŏng nhân jang ŭnh điên hlôi hơ met ‘lơ̆ng tơ drong sar bar păng tơ tĕnh chô̆ hơ met ming ŭnh điên.

Thuem: Tơ blơ̆