VOV4.Bahnar - Đơ̆ng khei 7 truh đĭ sơnăm au gô đei dang 50% ‘nu bơngai đơ̆ng 18 sơnăm năm tơ̆ ‘lo kră đei ƀet vaccine tang găn jĭ Covid-19. ‘Nau nơ̆r tơbăt đơ̆ng Dơnŏ anĭh tơm vei lăng jang pơgang păng Dơnŏ anĭh tơm Ƀô̆ đô̆i vei lăng sơlam tĕh đak pơma tơlĕch tơ̆ hop akŏm ƀlŭng a kơ Dơnŏ anĭh chĕp pơgơ̆r tơlĕch jang ƀet vaccine tang găn Covid-19 sơnăm 2021-2022 pơgơ̆r pơgê năr 2/7 tơ̆ Hà Nội. Kiơ̆ kơ ‘nŏh, tơdrong ƀet bơ̆ng đei jang kiơ̆ đơ̆ng khei 7 sơnăm au trŭh khei 4 sơnăm 2022, lơ̆m au, tŏ sĕt hloh 50% măt bơngai đơ̆ng 18 sơnăm năm tơ̆ ‘lŏ kră đei ƀet vaccine lơ̆m sơnăm 2021 păng trŭh jăl I sơnăm 2022 đei hlŏh 70% măt bơngai đei ƀet. Tơdrong jang ƀet bơ̆ng đei tơlĕch kơtang lơ̆m tĕh đak hăm vă jê̆ 19.000 hơnĭh ƀet bơ̆ng. Lơ̆m au, ăn ƀet hơdrol hăm rim dêh char pơlei tơm tŏk bŏk đei jĭ, đei lơ hơnĭh jang kmăi pơm tơlĕch tơmam drăm. Lơ̆m dêh char, pơlei tơm đei ăn ƀet hơdrol ‘nŏh chă ƀet hơdrol ăn rim bơngai tŏk bŏk oei lơ̆m tơring đei jĭ. Pơma hơdăh ‘nau ‘măng ƀet bơ̆ng kơtang hlŏh đơ̆ng sơ̆ trŭh dang ei, Kơdră chĕp pơgơ̆r Dơnŏ anĭh tơm vei lăng jang pơgang Nguyễn Thanh Long tơbăt, Hơnĭh au gô jang hơdoi kơ jăp hăm Dơnŏ anĭh tơm Ƀô̆ đô̆i vei lăng sơlam tĕh đak păng rim tơring đơ̆ng tơdrong sơng iŏk, chơ pơdŭ, vei răk, klăh asong vaccine, mă kăl sơđơ̆ng ‘lơ̆ng hơ iă ăn ƀet bơ̆ng.

Tơblơ̆ nơ̆r: Amazưt