VOV4.Bahnar - ‘Năr brei (25/5), Hop akŏm apŭng plĕnh teh rim đảng châu Á (ICAPP) hlôi pơ gơ̆r Hop akŏm trực tuyến mă loi ‘noh jĭ ‘măng mă 2 găh jĭ hơ buh COVID-19 hăm tơ drong vang akŏm đơ̆ng kơ dră chĕp kơ̆l 24 đảng truh đơ̆ng 18 teh đak châu Á, tang măt kơ Hop akŏm rim đảng Mỹ La tinh păng Caribbean păng 1,2 khŭl jang apŭng plĕnh teh. Rim bơ ngai tang măt vang Hop akŏm drơ̆ng nơ̆r akhan đĭ đăng rim kon pơ lei tơ̆ đĭ đăng rim teh đak ư̆h kơ pơ dê pơ drŏng dơ nuh athei gơ̆h iŏk yua hơ tŏ hơ nơ̆ng hăm rim tơ mam tang găn jĭ COVID-19 nhen vaccine kŭm hăm rim trong jang hơ len lăng păng hơ met jĭ. Ƀok Nguyễn Mạnh Cường, Bơ ngai jang lơ̆m Trung ương Đảng, Phŏ Kơ dră Anih jang tơ bôl Trung ương, Bơ ngai jang lơ̆m Anih chĕp kơ̆l pơ gơ̆r ICAPP, pơm Kơ dră khŭl Việt Nam, hlôi vang akŏm păng tơ gop ‘lơ̆ng tơ̆ Hop akŏm. Ƀok Nguyễn Mạnh Cường hlôi tơ roi tơ drong hlôh vao tang găn jĭ COVID-19 đơ̆ng Việt Nam lơ̆m khei ‘năr âu ki, hơ dai hăm ‘noh pơ ma hơ dăh pơ kăp đơ̆ng Đảng Cộng sản Việt Nam găh jang hơ dai apŭng plĕnh teh lơ̆m tang găn jĭ COVID-19.

Thuem: Tơ blơ̆