VOV4.Bahnar - Pơgê năr 6/12, tơ̆ Hnam Kuôk hô̆i, Dơnŏ anĭh vei lăng bơ̆ jang Tơpôl kơ Kuô̆k hô̆i pơgơ̆r hop akŏm ‘măng mă 5 vă dăr lăng hơlen Hla bơar pơtrŭh ăn Khŭl kơdră Tĕh đak găh mĭnh ƀar tơdrong tơchơ̆t, tơdrong bơ̆ jang kăl lơ̆m tang găn jĭ Covid-19. Kơ iĕng Kơdră chĕp pơgơ̆r Kuô̆k hô̆i Trần Thanh Mẫn vang năm hop akŏm. Dăr lăng hơlen Hla bơar pơtrŭh ăn Khŭl kơdră Tĕh đak, rim kơdră tang măt athei pơm hơdăh tơdrong tơchơ̆t găh măt bơngai vang jang ƀet bơ̆ng, khăm hơlen, vei lăng năng tông bơngai jĭ Covid-19. Tơ̆ Hop akŏm, Kơ iĕng Kơdră chĕp pơgơ̆r Kuô̆k hô̆i Trần Thanh Mẫn athei hơnơ̆ng pơm hơdăh trong hơmet ming kơ tơdrong Tơchơ̆t lăp akŏm rim trong jang kăl, gĭt kăl găh tang găn jĭ Covid-19 pha hăm tơdrong tơchơ̆t kơ khôi uơ̆t dăh mă tim mă đei khôi luơ̆t tơchơ̆t. Hơnơ̆ng dăr lăng dơ̆ng đĭ đăng trong bơ̆ jang, twodrong tơchơ̆t đei chĭh tơmơ̆t lơ̆m Tơdrong tơchơ̆t vă tơroi tơbăt ăn Dơnŏ anĭh chĕp pơgơ̆r Kuô̆k hô̆i.

Tơblơ̆ nơ̆r: Amazưt