VOV4.Bahnar - Tơ̆ jơ bơ̆ jang pơgê năr 23/4 hăm pơlei tơm Hồ Chí Minh găh bơ̆ jang tang găn jĭ Covid-19, Kơ iĕng Thủ tướng Vũ Đức Đam athei rim khŭl atok kơtang dăr lăng lơ̆m jơ ‘năr lê̆h jê̆ trŭh au kơnh, lăng hơlen dôm bơngai mơ̆t klĕnh, adoi nhen gom mŭh măt mưh năm tơ̆ lơ bơngai vă tang găn tơpŏh jĭ. Iung pơma tơ̆ hop akŏm, Kơ iĕng Thủ tướng Vũ Đức Đam akhan, pơlei tơm Hồ Chí Minh hlôi tang găn kĕ jĭ Covid-19 hăm lơ trong jang hơ iă hlŏh lơ̆m tĕh đak. Mă lei, giĕng au ki, tơring châu Á tŏk 34% măt bơngai tơpŏh jĭ Covid-19, rim tĕh đak lơ̆m tơring jei tŏk bŏk đei măt bơngai tơpŏh kơtang, pơlei tơm Hồ Chí Minh jĭ mĭnh tơring hơmơt tơpŏh kơtang, kon pơlei năm tơ̆ au lơ, kơ yuơ lơ lŏh kăl hơnơ̆ng dăr lăng kơ jăp, mă kăl hăm dôm bơngai đơ̆ng tĕh đak đe mơ̆t tơ̆ au. Kơ iĕng Thủ tướng athei kăl atŏk kơtang bơ̆ jang dăr lăng bơngai mơ̆t klĕnh, adoi nhen tơdrong gom mŭh măt tơ̆ tơring kơdrơ̆m bơngai vă tang găn tơpŏh jĭ.

Tơblơ̆ nơ̆r: Amazưt