VOV4.Bahnar - Lơ̆m ‘măng đei jĭ Covid-19 mă 4, đei kơ hrĕng ‘nu kăn ƀô̆ linh jang pơ gang năm bơ̆ jang tơ gŭm ăn dôm dêh char tơ ring đei jĭ tơ̆ găh Pơ băh ."Đĭ jĭ ‘mơ̆i brŏk" ‘nŏh jĭ nơ̆r pơ ma đơ̆ng kăn ƀô̆ linh jang pơ gang lơ̆m tơ drong tang găn jĭ hơ buh đei pơ tih nhen thoi tơ drong tơ blăh ưh đei jơ va ƀrâm đôh. Bơ ngai chih tơ drong kơ tơ̆ng ang ăn Radio nơ̆r pơ ma VN hlôi chih iŏk jơ hngâm đon 'lơ̆ng kŭm nhen tơ drong tơ chĕng đơ̆ng đe kăn ƀô̆, y ƀak si adrol jơ năm jang tơ̆ dôm dêh char găh Pơ băh, vang jang tơ gŭm ăn dôm hnam pơ gang hơ met jĭ hơ buh tơ̆ plt Hồ Chí Minh.

100 ‘nu ƀak si, bơ ngai jang pơ gang, bơ ngai truh đơ̆ng Hnam hŏk Quân y, bơ ngai truh đơ̆ng hnam pơ gang Quân y 7, Hnam pơ gang Quân y 103 păng Hnam pơ gang cổ truyền Khul linh, đơ̆ng hrôih đei măt tơ̆ anih akŏm kơ Lữ đoàn chơ chuĕn 971 Sóc Sơn vă năm jang. Đĭ đăng tơ tă hrŭk hơ băn ao linh jang ngăl, pŭ ba 1 ƀalo, ‘nŏh jĭ tơ mam đe linh năm jang tang găn jĭ. 

Adrol vă năm jang tơ̆ dôm dêh char găh Pơ băh, đe linh jang pơ gang lăp tom krao điên thoăi ăn unh hnam pơ ma tŏ sĕt nơ̆r đĕch. Yoa nơ̆r athei năm jang đei tơ lĕch ƀât tŏk bŏk măng, pơ gê hrôih đơ̆ng rŏng athei năm jang tơ̆ plt Hồ Chí Minh hloi, đe kăn ƀô̆, linh jang pơ gang lăp tom hơ met ming tơ mam kăl kơ dih đĕch, ưh tom tơ gĕch brŏk tơ̆ hnam. Ƀât lăp nhen drŏ kăn thiếu tá Nguyễn Thị Kiên – Hnam pơ gang Quân y 7 tam mă tom roi tơ băt ăn unh hnam hloi. Mŏ ăn tơ băt: “Klo inh tam mă băt, yoa inh iŏk đei nơ̆r athei năm jang tơ̆ kơ măng, inh ưh kơ tom tơ roi, klo inh năm jang bơih, klo inh jang lơ̆m khul linh ‘năi, klo inh jĭ công an. ”

Đe linh jang pơ gang iŏk nơ̆r athei adrol kơ năm jang

Tơ drong năm jang ưh tom băt âu ƀât lăp dang 15 năr, ƀât lăp đunh hlŏh dơ̆ng, ưh đei bu apĭnh năr brŏk, yoa kơ sô̆ bơ ngai jĭ oei tŏk hơ nơ̆ng, păng bôl boăl năm hơ drol oei adrin chă hơ met ăn bơ ngai jĭ tơ̆ dôm hnam pơ gang hăm ƀĕnh tơ drong mơ mat tat, tŏ ‘mi kial ưh kơ ‘lơ̆ng, mă lei bu bu kŭm adrin jang tôch ai khŏm tang găn đĭ jĭ. Đe sư băt đĭ hrŭk tơ̆ hơ kâu 2 kơ mâu ao linh păng ƀak si 'nŏh mưh đei tơ drong krê hơ mơt đơ̆ng jĭ, 'nŏh jĭ kơ plăh kon pơ lei, tĕh đak kăl kơ đe sư hlŏh.

Lơ̆m jơ hngâm đon 'mĕh jăh năm truh tơ̆ tơ ring đei jĭ, Đại úy, ƀak si Đặng Văn Ba khoa hơ met jĭ ăl, Hnam pơ gang Quân y 103, pơ ma: “Lăng ƀôh lơ̆m tivi, lơ̆m mang păng đe ‘nhŏng ŏh tơ̆ noh roi tơ băt kơ sô̆ bơ ngai jĭ F0, mă loi jĭ bơ ngai F0 jĭ ăl tôch lơ, nhôn tôch tơ tŏ jơ hngâm kŭm 'mĕh jăh năm jang tơ̆ noh vă chă tơ gŭm ăn 'nhŏng ŏh bơ ngai jang pơ gang, tơ gŭm ăn bơ ngai jĭ tơ drong kiơ 'nŏh hơ iă hăm tơ drong 'nei.”

Băt hơ dăh ‘nâu jĭ tơ drong tơ blăh lơ̆m khei ‘năr rơ ngei, jô̆ hloi dôm bơ ngai mơ lôh nhen Trung sỹ Phạm Công Kim, hŏk tơ̆ Hnam hŏk Quân y kŭm chu plang đĭ jơ hngâm kơ dih păng băt hơ dăh hơ năp jang kơ dih mưh đei nơ̆r athei năm jang tơ̆ hnam pơ gang hơ met jĭ hơ buh tơ̆ plt Hồ Chí Minh: “Nhôn đei pơ tâp pơ hrăm 3 ‘măng bơih, pơ tâp găh tơ drong set hơ len jĭ, iŏk hla ar hơ len jĭ, nhôn gơ̆h tơ gŭm ăn tơ drong set hơ len jĭ vă bơ̆ jang tang găn jĭ păng tơ drong hơ met jĭ nhôn kŭm gơ̆h jang kiơ̆ ‘năi.”

Hơ chăng lê̆ tơ̆ rŏng jĭ kon kăn, mĕ ƀă, yă ƀok kră mă lei dôm bơ ngai lơ̆m unh hnam âu hơ nơ̆ng băt hơ dăh tơ drong jang đơ̆ng đe linh, vă akŏm jơ hngâm tơ gŭm ăn tơ drong tang găn jĭ tôch gĭt kăl đơ̆ng kon mon đe sư. Gơ nơm thoi nŏh mă đe linh sơ đơ̆ng jơ hngâm, khŏm bơ̆ jang mă băt tơ̆ hơ năp oei đei lơ tơ drong mơ mat tat ră. Mă loi jĭ hăm dôm unh hnam pơ đĭ 2 'nu klo kăn jang lơ̆m khul linh ngăl, tơ tă năm jang lơ̆m khul tang găn jĭ blŭng a ngăl.

Điều dưỡng linh jang pơ gang Nguyễn Thị Kiên ăn tơ băt: “1‘nu mon hŏk lăm 10, 1 ‘nu mon hŏk lăm 4 mă lei mĕ ƀă hơ nơ̆ng trư̆k tơ̆ kơ măng, klo inh dang ei oei jang tơ̆ anih vei lăng bơ ngai oei hơ drô̆ kơ na bre mon kŭm băt, đei đon adrin đơ̆ng ki bơih, đĭ juăt hăm tơ drong mĕ ƀă hrŭl tơ̆ hnam kơ na măr sư hơ nơ̆ng athei băl adrin hŏk, sŏng xa trŏ jơ. ”

Thiếu tá Đỗ Mai Phương, Hnam pơ gang quân y 7 năm jang tơ gŭm tơ̆ plt HCM vang tang găn jĭ

Nhen thoi nŏh mơ̆n Thiếu tá – Ƀak si Đỗ Mai Phương lê̆ 2 ‘nu kon ‘lơ̆p tơ̆ hnam lăng băl ‘năi, oei kơ dih kâu ‘nŏh mât tơ̆ tơ ring Pơ băh vang tang găn jĭ, mă ưh đei pơ ngơ̆t kiơ lơ: “2 ‘nu mŏ ŏh oei tơ̆ hnam lăng băl, inh băt hơ dăh tơ drong jang inh ‘nŏh vang akŏm kơ sư̆k tang găn jĭ hăm kon pơ lei tơ̆ tơ ring Pơ băh, băt hơ dăh tơ drong jang kơ na ưh đei tơ chĕng tơ drong kiơ lơ.” 

Chĕp vei kơ jăp jơ hngâm đon adrin, bơ̆ jang khŏm iŏk đei jơ nei đơ̆ng Khul linh kơ tang nuih mơng, hăm đon tơ chĕng đĭ đăng yoa kon pơ lei tơ ring Pơ băh ‘mêm kơ eng, bơ̆ jang “tang găn jĭ nhen tơ blăh hơ yăt”, bơ̆ jang mă pran kơ tang hlŏh dơ̆ng, athei bơ̆n đei đon adrin hlŏh dơ̆ng, kơ chăng iŏk jang kĕh đang ‘lơ̆ng rim tơ drong đei pơ jao. Adrol kơ ‘nŏh, Anih tơm vei lăng khul linh tĕh đak pơ tho ăn rim anih jang, khul linh pơ jing 7 hnam pơ gang hơ met jĭ tơ̆ dôm dêh char, plt tơ̆ tơ ring Pơ băh, kĕ iŏk hơ met ăn 3.500 ‘nu bơ ngai jĭ păng kơ chăng pơih xă hlŏh dơ̆ng, vă gơ̆h iŏk hơ met ăn 10.000 ‘nu bơ ngai jĭ.

Tơ drong tơ klăh ti đơ̆ng đe linh, ƀak si kŭm đei pơ gơ̆r pha ‘năi, ưh đei kơ tum kơ tŏng ‘nhŏng ŏh, lăp hơ drô̆ bôl boăl rôp ti băl mă jơ hngâm đon hơ nơ̆ng tơ chĕng truh bơ ngai jĭ oei gô chang. Đe sư druh kiơ̆ kơ hrĕng ‘nu kăn ƀô̆, y ƀak si khul linh oei bơ̆ jang tơ̆ 7 hnam pơ gang hơ met jĭ yoa khul linh pơ jing tơ̆ tơ ring đei jĭ găh dôm dêh char tơ̆ Pơ băh, anih oei hơ met ăn rơ bâu 'nu bơ ngai jĭ Covid hăm đon pơ hnŏng khŏm vei lăng tơ drong arih, jơ hngâm pran ăn kon pơ lei, yoa 1 năr yơ 'nŏh ưh pă đei jĭ kiơ.  

Dơ̆ng: Tơ blơ̆