VOV4.Bahnar – Pơgê năr (1/12), tơ̆ plei tơm Kon Tum, Anih vei lăng kon pơlei dêh char Kon Tum pơm lêh xơng iŏk tơmam y tê̆ 'măn ăn tơdrong jang tang găn păng tơjră pơrang jĭ COVID-19 kơyuơ dêh char Bình Dương axong ăn.

          Iŏk xơnong pơjao đơ̆ng anih kơpal kơ dêh char, anih vei lăng kon pơlei dêh char Bình Dương, tang măt ăn Anih jang Măt trâ̆n tôh kuôk Việt Nam dêh char Bình Dương păng Anih jang Y tê̆ dêh char Bình Dương hlôi pơjao ăn dêh char Kon Tum minh ƀar tơmam y tê̆ tơgŭm dêh char jang tang găn păng tơjră hăm pơrang COVID-19, đei 200 tŏ giơng mam, 100 tŏ kơmăi pơjing oxy, 200 tŏkơmăi pơkă SPO2 păng 520 tŏ nhiê̆t kê̆. Truh dang ei dêh char Kon Tum đei hloh 600 'nu ƀơm jĭ COVID-19, lơ̆m noh đei 44 'nu lơ̆m tơpôl păng tam mă đei bơngai jĭ yơ jing jĭ hlăm kiơ̆ pơkăp tăl 2, 3. Yơ̆ng âu ki, dêh char Kon Tum hlôi pơtruh khul jang 30 'nu jang y tê̆ tơgŭm ăn dêh char Bình Dương tơjră pơrang jĭ. Vang jang vei lăng, hơmet dôm bơngai ƀơm F0 jing dôm tơdrong hlôh vao kăp gĭt tŏk bŏk đei anih jang y tê̆ dêh char tơlĕch iŏk jang tơ̆ dôm anih hơmet jĭ.  

Lan chih păng pơre nơ̆r