VOV4.Bahnar - Tơ̆ ‘măng jang sơ lam Pu Prăng (xăh Quảng Trực, apŭng Tuy Đức, dêh char Dak Nông), Anih vei lăng kon pơ lei dêh char Dak Lak hlôi pơ gơ̆r pơ jao jên, phe, tơ mam sa, tơ mam tơ gŭm dêh char Mondulkiri (teh đak Campuchia) tang găn jĭ COVID-19. ‘Măng âu, kang ƀô̆, khŭl linh, kon pơ lei dêh char Dak Lak asong dêh char Mondunkiri 200 triệu hlak jên, 5 tấn phe, 300 kơ thŭng mi tôm, 7.000 che gom; asong kon pơ lei Việt Nam tŏk bŏk arih sa, bơ̆ jang tơ̆ âu 3 tấn phe, 300 kơ thŭng mi tôm, 3.000 che gom, 150 tơ pu tơ mam ‘noh đei dôm tơ mam yua, đak ôp ti.

Jơ pơm lêh pơ jao asong

Ƀlep lơ̆m ‘măng âu, Anih tơm pơ gơ̆r khŭl linh dêh char Dak Lak kŭm asong 2 tấn phe, lơ tơ mam yua, đak ôp ti, che gom y tế... hăm akŏp kơ jă hloh 100 triệu hlak jên asong ăn Anih vei lăng khŭl linh dêh char Mondulkiri, Quân khu 1, khŭl linh kơ ƀok pơ tao Campuchia; Đoàn hơ druh tơ dăm Cộng sản Hồ Chí Minh dêh char Dak Lak asong ăn hơ druh tơ dăm dêh char Mondulkiri 10.000 che gom y tế.

Thuem: Tơ blơ̆