VOV4.Bahnar -  Kơsơ̆ năr 12/3, Dơnŏ anĭh Đảng, Jơnŭm vei lăng kon pơlei, Dơnŏ anĭh vei lăng kon pơlei, Dơnŏ anĭh Măt trân Tô quốc Việt Nam dêh char Kon Tum hlôi pơgơ̆r tơ ƀơ̆p pơma dơnŭh hăm khŭl chĭh kơtơ̆ng ang, bơngai jŏh hơri, bơngai hŏk jrŭ sơnăm 2021. Tơ̆ jơ tơ ƀơ̆p, tang măt ăn khŭl chĭh kơtơ̆ng ang, bơngai joh hơri, bơngai hŏk jrŭ đei lơ nơ̆r tơgop tơpăt ‘lơ̆ng hơiă hăm kơdră chĕp pơgơ̆r dêh char Kon Tum. Mă hơdăh, dôm trong jang vă atŏk kơtang hơnăp jang khŭl chĭh kơtơ̆ng ang kĕch mang lơ̆m chăl hle hrei au. Găh tơdrong ư̆h kơ măh kmăi kmŏk, bơngai jang păng kon jên hơnĭh chĭh kơtơ̆ng ang.

Rup jơ tơ ƀơ̆p muh măt

Vang hơlêm hăm dôm tơdrong mă rim bơngai chĭh kơtơ̆ng ang, bơngai jŏh hơri păng bơngai hŏk jrŭ lăng trŭh, Bí thư Đảng dêh char Kon Tum Dương Văn Trang tơbăt, lơ̆m 5 sơnăm kơnh dêh char tơlĕch jang pơtăm ‘nao 15.000ha bri păng hơdrin vei lăng năng tông bri ‘long dang ei đei. Xek tơlang kơhret hăm dôm bơngai pơm glăi khôi luơ̆t bri; tơ jur ŭnh hnam dơnuưh bơngai kon kông; atŏk kơtang krao hơvơn hơnih mơdro sa tơmơ̆t jên jang vă pơtrŭt kơtang jang mŭk drăm tơpôl kơ dêh char atŏk tơ iung.

Tơblơ̆ nơ̆r: Amazưt