VOV4.Bahnar– Lơ̆m 1 giĕng, plei tơm Buôn Ma Thuột, dêh char Đăk Lăk đei dôm jĭt 'nu ƀơm jĭ lơ̆m tơpôl mă ưh kơ băt tơm a tơpoh jĭ, chă vih vơ̆t lơ tơring. Tơrĕk hloh noh anih hơbuh pơrang jĭ tơ̆ xăh Cư Êbur hăm 17 'nu ƀơm jĭ.

          Hăm tơdrong hơbuh hli đơ̆ng pơrang jĭ COVID -19, khul juăt jang kơ plei tơm Buôn Ma Thuột hlôi tenh kuăng pơkăp tơring, chơ chă păng pơkăp pơvei dôm tơring đei tơrĕk. Đơ̆ng kơsơ̆ năr 22/8 xăh Cư Ebur hlôi pơkăp pơvei tôm pơlei Ea Bông hăm 10 anih hơlen. Atŭm hăm noh tơlĕch test renh ăn kon pơlei. Năr 23/8 đei ƀôh lơ̆m kơsô̆ hloh 1.500 đak muh test renh tơ̆ pơlei Ea Bông, đei 17 'nu ƀơm jĭ SARS –CoV-2. Đơ̆ng rŏng kơ ƀôh băt, lơ̆m năr 23/8, Anih vei lăng kon pơlei plei tơm Buôn Ma Thuột hlôi axong yua tơchơ̆t kơsô̆ 16 lơ̆m jâ̆p xăh Cư Êbur. Thoi noh, lơ̆m 8 năr, đơ̆ng 16/8 truh  23/8, plei tơm Buôn Ma Thuột hlôi đei 28 'nu ƀơm jĭ COVID -19 tơ̆ 4 anih hơbuh pơrang jĭ lơ̆m tơpôl.  

Lan chih păng pơre nơ̆r