VOV4.Bahnar -  Jơnŭm vei lăng kon pơlei dêh char Lâm Đồng jăl X hlôi pơgơ̆r hop akŏm mă 4 vă lăng hơlen pơtôch jang kiơ̆ atŏk tơ iung mŭk drăm-tơpôl păng lăng hơlen, pơdrơ̆ng kiơ̆ mĭnh ƀar tơdrong tơchơ̆t gĭt kăl.

Rup hop akom ‘măng mă 4, Jơnŭm vei lăng kon pơlei dêh char Lâm Đồng jăl X

Kiơ̆ hla bơar chĭh tơbăt bơ̆ jang tơ̆ ‘măng hop akŏm, mă đơ̆ng đei ƀơm kơnê̆ đơ̆ng jĭ hơbŭh Covid-19, mă lei Lâm Đồng oei vei kơ jăp trong atŏk kơtang mŭk drăm hlŏh 3,1%. Lơ̆m au, hơdrô̆ chŏh jang sa tŏk 4% păng jang kmăi kmŏk pơm tơlĕch tơmam drăm - ming man tŏk 5,5%. Mă kăl, thuê̆ ăn hơnĭh mong jên bơ̆ jang tĕh đak iŏk đei 10.620 ti hlak jên, tŏk 12,7% pơtêng hăm sơnăm sơ̆. Mă lei, Lâm Đồng oei pă 8 lơ̆m 18 trong tơlĕch jang Mŭk drăm-Tơpôl tim mă jang keh đang. Tơdrong jang pơm tơlĕch tĕch mơdro tơmam drăm kơ hơnĭh mơdro sa tơ ƀơ̆p tôch lơ tơdrong tơnap tap, tơmang pơ hiơ̆ nhen lĕ ư̆h kơ đei pơgơ̆r, mơdro sa iŏk đei tơ jur kơtang; phă pơrăm bri, bơbt iŏk tĕh đei ƀô̆h hơnơ̆ng; oei đei tơdrong tĕch mơdro tĕh chŏh jang sa ư̆h kơ ƀlep hăm tơdrong tơchơ̆t đei ƀô̆h hơnơ̆ng tơ̆ minh ƀar tơring ... ‘Măng hop akŏm mă au, dêh char akŏm hơlen hơdăh, pơma dơnŭh păng pơm hơdăh rim tơdrong, kiơ̆ đơ̆ng nŏh tơlĕch rim trong hơmet pơ ‘lơ̆ng, atŏk kơtang atŏk tơ iung Mŭk drăm-Tơpôl păng jang keh đang trong tơlĕch jang, tơdrong jang tơm lơ̆m khei năr kơnh.

Tơblơ̆ nơ̆r: Amazưt