VOV4.Bahnar – Pơgê 'năr brei (23/7), đei dơ̆ng 1.228.500 kơliu vaccine AstraZeneca hlôi đei pơtruh tơ̆ plei tơm HCM. 'Nâu jing 'măng pơjao vaccine mă pơđăm păng duh jing kơsô̆ vaccine lơ hloh đơ̆ng xơ̆ truh dang ei lơ̆m pơkăp răt adrol đơ̆ng AstraZeneca Việt Nam păng Anih pơm tơlĕch vaccine Việt Nam (VNVC), hăm tơdrong tơgŭm đơ̆ng Anih tơm Y tê̆. Thoi noh, jô̆ truh khei năr âu, tơdrong pơkăp răt adrol đơ̆ng AstraZeneca Việt Nam păng VNVC (đei kĭ pơkăp ăh khei 11 xơnăm 2020) hlôi hơ 'nhăk ăn Việt Nam hloh 3,1 trĭu kơliu, hơtŏ pơhlom 37% kơsô̆ vaccine Covid-19 đơ̆ng AstraZeneca lơ̆m teh đak. Kơsô̆ oei lăi noh đei axong đơ̆ng Trong Pơkăp COVAX păng tơgŭm 2 păh đơ̆ng khul kơpal dôm teh đak. Kiơ̆ kơ yă Vũ Thị Thu Hà, Kơdră Anih axong pơgang ƀet bơ̆ng jĭ VNVC, noh truh âu kơnh, dôm jĭt trĭu kơliu vaccine bơ̆ng jĭ Covid-19 đơ̆ng AstraZeneca gô pơtoi đei 'nhăk vih truh Việt Nam kiơ̆ pơkăp răt 30 trĭu kơliu vaccine đơ̆ng VNVC.

Lan chih păng pơre nơ̆r