VOV4.Bahnar - Năr blŭng giĕng âu ‘nâu, Anih tơm vei lăng khul linh tĕh đak pơm lêh tơ lĕch tơ drong pơ jei gĭt kăl hăm hơ năn “Khul linh kŭm hăm tĕh đak akŏm jơ hngâm vang pơ jei băl tang găn păng hơ met đĭ jĭ Covid-19”. Jang kiơ̆ tơ drong lêh, kăn ƀô̆, linh tơ̆ lơ tơ ring lơ̆m tĕh đak mơ̆ng nơ̆r nơ̆r athei ăn khul linh quân y năm tơ̆ dôm dêh char găh Pơ băh bơ̆ jang tang găn jĭ Covid 19.

Tang măt ăn Quân ủy Trung ương, Anih tơm vei lăng khul linh tĕh đak, Khul vei lăng pơ jei-pôk hơ păh kơ Anih tơm vei lăng khul linh tĕh đak, tơ lĕch tơ drong pơ jei băl, Đại tướng Lương Cường Kơ dră vei lăng Anih jang chinh trĭ kơ Khul linh kon pơ lei pơ ma hơ dăh, Tơ drong pơ jei băl tôch gĭt kăl “Khŭl linh kŭm hăm tĕh đak akŏm jơ hngâm pơ jei băl tang găn păng hơ met đĭ jĭ Covid-19”, pơm ăn rim kăn ƀô̆ linh băt hơ dăh jơ hngâm đon "tang găn jĭ nhen tơ blăh hơ yăt", "roi mơ mat roi adrin pơ jei băl", "đĭ adrin bơih roi adrin hlŏh dơ̆ng; đĭ tơ guăt ƀơ̆r đon bơih roi tơ guăt kơ jăp hlŏh dơ̆ng; đĭ pơ hnŏng bơih athei pơ hnŏng dêh hlŏh dơ̆ng", hơ tŏk đon jang tơ năp yoa kon pơ lei, yoa tĕh đak, đei đon adrin đơ̆ng kơ dih, khŏm yak hlŏh mơ mat tat, kơ chăng năm hơ drol lơ̆m tơ drong tơ blăh tang găn jĭ, jang đang ‘lơ̆ng rim tơ drong jang chinh trĭ gĭt kăl, năng ‘nŏh jĭ tơ drong tơ blăh đơ̆ng khul linh lơ̆m khei ‘năr rơ ngei. Đĭ đăng kăn ƀô̆, linh lơ̆m khul linh tĕh đak tơ̆ dôm tơ ring hơ tŏk tơ drong jang hơ doi, tơ gŭm ăn anih jang đảng, khul kơ dră tơ ring hơ met pơ ‘lơ̆ng mơ mat tat, tơ gŭm kăt yoă ƀa, phĕ plei ‘long păng chơ tĕch tơ mam đơ̆ng choh jang đei, pơ truh tơ mam yoa kăl lơ̆m tơ drong arih xa păng vei lăng jơ hngâm pran kon pơ lei; hơ met trong tang găn jĭ kơ jung hlŏh dơ̆ng vă tơ tom tơ jră, sek tơ lang, ưh gơ̆h lê̆ đei đon ưh kơ chăng hăm rim tơ drong.

Đại tướng Lương Cường pơ ma hơ dăh, đĭ đăng khul linh akŏm jơ hngâm pơ jei băl, tơ ƀôh hơ dăh đon pơ hnŏng tơ blăh khŏm đei, kơ chăng, adrin tôch ai, hơ nơ̆ng năm hơ drol păng jang đang ‘lơ̆ng tơ drong tang găn jĭ: “Hơ nơ̆ng bơ̆ jang hơ len lăng ‘lơ̆ng tơ̆ tơ ring păng tơ drong jĭ, mă loi 'nŏh tơ̆ tơ ring gĭt kăl vă tơ tom roi tơ ƀôh ăn QUTƯ, Anih tơm vei lăng khul linh tĕh đak, Grŭp jang gĭt kăl kơ Khul kơ dră tĕh đak tơ̆ tơ ring găh Pơ băh, bơ ngai chĕp kơ̆l pơ gơ̆r păng Anih pơ gơ̆r jang tang găn jĭ dôm tơ ring vă pơ gơ̆r jang đei yoa 'lơ̆ng tơ drong tang găn jĭ. Hơ nơ̆ng jang hơ doi kơ jăp hăm anih jang đảng, khul kơ dră tơ ring păng khul linh tơ̆ tơ ring vei kơ jăp tơ drong jang đơ̆ng rim grŭp, anih gak tơ̆ trong sơ lam, tơ̆ đak dơ sĭ, khŏm tang găn bơ ngai đơ̆ng nai mât glăi luơ̆t. Pơ gơ̆r 'lơ̆ng dôm anih oei hơ drô̆, hnam pơ gang tang găn jĭ, adrin chă set hơ len jĭ păng ƀet vaccine ăn kon pơ lei, hơ met ăn bơ ngai jĭ, mă loi 'nŏh bơ ngai jĭ ăl tơ̆ dôm hnam pơ gang lơ̆m păng 'ngoăih kơ khul linh...”

Tơ̆ jơ pơm lêh 220 anih pơih pơ dăh lơ̆m khul linh jang kiơ̆ tôch hơ iă tơ drong lêh tơ lĕch trong Pơ jei băl gĭt kăl păng tơ ƀôh hơ dăh đon pơ hnŏng, đon tơ năp hăm lơ tơ drong jang tôch đei yoa vă tang găn jĭ. Oei tơ̆ dôm dêh char găh tơ ring Pơ băh tŏk bŏk đei jĭ tôch hơ mơt, lơ̆m nŏh đei plt Hồ chí Minh, Thiếu tướng Nguyễn Trường Thắng, Yŏng chĕp kơ̆l Quân khu 7 ăn tơ băt mă đei tơ drong kiơ khul linh quân khu vă hơ nơ̆ng năm hơ drol lơ̆m tơ drong tang găn jĭ: “Đĭ đăng quân khu pơih tơ drong pơ jei băl tang găn jĭ dŏng kon pơ lei, jang hơ doi kơ jăp hăm anih jang đảng, khul kơ dră tơ ring, khul grŭp tơ pôl păng kon pơ lei, dôm khul jang kơ pal tơ lĕch jang hrơ̆ch ‘lơ̆ng, dôm trong jang tang găn jĭ, pơih xă tơ ring ưh đei jĭ, tơ jur ƀiơ̆ tơ ring đei jĭ, năm truh tơ drong găn đĭ jĭ tơ̆ rim tơ ring. Atŭm hăm ‘nŏh vang jang ‘lơ̆ng tơ drong dŏng pơ ngot, tơ gŭm ăn bơ ngai jĭ, ưh gơ̆h lê̆ kon pơ lei pơ ngot mơ mat tat, ưh kơ măh, kơ băh kơ ƀôch.”

Hăm khul linh vei lăng tơ ring sơ lam, Anih chĕp kơ̆l pơ gơ̆r Ƀô đô̆i vei lăng tơ ring sơ lam dôm dêh char găh Tu păng găh Tu kơ tơ ring Tŏk bŏk rơih 58 'nu kăn ƀô̆ quân y đei hŏk jrŭ, jang gơ̆h vang truh pơ tâp pơ hrăm pơ tho ăn đe thây kô, ƀak si Hnam pơ gang tang găn jĭ kơ khul linh păng kăn ƀô̆ anih jang quân y ƀô đô̆i vei lăng tơ ring sơ lam. Dôm bơ ngai kiơ̆ hŏk tơ̆ lăm âu đei hŏk găh tơ drong jang, đon hlôh vao vă tang găn jĭ Covid 19, kơ chăng năm tơ gŭm ăn khul linh păng kon pơ lei tơ̆ tơ ring Pơ băh, hơ met 'lơ̆ng tôm tơ drong vă gơ̆h jang hơ doi vang tơ lĕch dôm tơ drong jang kăl, adrin vang tơ gop kŭm hăm khul jang tang găn jĭ hơ drol jăh găn đei jĭ Covid 19 kiơ̆ nơ̆r pơ tho đơ̆ng Thủ tướng tĕh đak.

Tơ̆ lêh năm jang, Trung tướng Đỗ Danh Vượng Chính ủy, Ƀô đô̆i vei lăng tơ ring sơ lam pơ ma hơ dăh: “Tang măt ăn Anih jang Đảng, Anih chĕp kơ̆l pơ gơ̆r linh inh pơ jao tơ drong jang ăn đe 'nhŏng ŏh, hơ pơi 'mĕh đơ̆ng Anih jang Đảng, Anih chĕp kơ̆l pơ gơ̆r, hơ drol hlŏh jĭ 'nhŏng ŏh băt hơ dăh tơ drong krê hơ mơt, tơ drong gĭt kăl đơ̆ng bơ̆ jang tang găn jĭ păng athei hlôh vao tôm hơ năp jang 'lơ̆ng hơ iă đơ̆ng khul linh pơ ma atŭm, ƀô đô̆i vei lăng tơ ring sơ lam pơ ma hơ drô̆ păng kăl hlŏh jĭ đơ̆ng khul linh quân y tơ̆ tơ ring sơ lam lơ̆m tơ drong jang 'nâu; ƀôh hơ dăh tơ drong hưch hanh, čhôk 'nă vă đơ̆ng nŏh đei đon adrin, jang tơ năp kŭm hăm đĭ đăng khul linh, đĭ đăng kon pơ lei tang găn đei tơ drong jĭ. Kŭm nhen kơ chăng iŏk jang rim tơ drong jang yơ kiơ̆ nơ̆r athei đơ̆ng rim anih jang, khul linh lơ̆m khei 'năr năm jang tơ gŭm, vă pơm thoi yơ bơ̆n gơ̆h tang găn 'lơ̆ng hlŏh păng iŏk đei jơ nei hrĕnh hlŏh hăm tơ drong jĭ Covid 19, vei lăng 'lơ̆ng jơ hngâm pran, tơ drong arih kơ kon pơ lei lơ̆m tĕh đak bơ̆n.”

Gơ̆h pơ ma, vă jê̆ 2 sơ năm âu ki, ƀô đô̆i vei lăng tơ ring sơ lam hơ nơ̆ng jing khul linh năm jang hơ drol, pơ jing trong sơ đơ̆ng tơ̆ tơ ring sơ lam hăm 1.974 grŭp gak, hlŏh 8221 'nu kăn ƀô̆, linh ƀô đô̆i vei lăng tơ ring sơ lam vang bơ̆ jang tang găn bơ ngai mât lĕch glăi luơ̆t păng tang găn jĭ; tơ lĕch tơ drong jang đĭ đăng kon pơ lei vang tang găn jĭ Covid 19 păng bơ ngai mât lĕch glăi luơ̆t tơ̆ jơ̆p tơ ring sơ lam păng đei tơ drong pơ chĕh pơih trong mât lĕch sơ đơ̆ng, pơm 'lơ̆ng ăn tơ drong tang găn jĭ tơ̆ dôm 'măng jang sơ lam; ưh hli gleh hrat mơ mat tat, ưh hli jĭ tơ pŏh akŏm đĭ jơ hngâm vang tơ gŭm ăn kon pơ lei tơ̆ dôm anih oei hơ drô̆, tơ ring pơ vang găn. Jơ pơm lêh năm jang 'măng mă âu tơ ƀôh hơ dăh jơ hngâm đon kơ chăng năm tơ gŭm ăn dôm tơ ring tơ tŏ “chu năm tơ̆ jâp tơ ring, jang rim tơ drong kiơ mă tĕh đak kăl” đơ̆ng khul linh.

Dơ̆ng: Tơ blơ̆