VOV4.Bahnar - Kiơ̆ nơ̆r tơ roi đơ̆ng Anih vei lăng pơ tho pơ hrăm dêh char Kon Tum, ‘măng thi tốt nghiệp trung học phổ thông đơt 1 sơ năm ‘nâu kơ sô̆ hŏk tro đŏu tốt nghiệp truh 98,26% păng đei 1 ‘nu hŏk tro đei điêm lơ hlŏh lơ̆m tĕh đak khô̆i D.

Đơt 1 âu ki, dêh char Kon Tum đei 4.483 ‘nu hŏk tro vang thi păng kơ sô̆ hŏk tro thi đŏu tốt nghiệp ‘nŏh 4.405 ‘nu.  Dêh char Kon Tum đei bơ ngai thi iŏk đei điêm lơ hlŏh lơ̆m tĕh đak găh khôi D ‘nŏh jĭ hŏk tro Bùi Thị Ngọc Quỳnh, lăm 12 chuyên Văn, Hnam trưng THPT Chuyên Nguyễn Tất Thành hăm kơ sô̆ điêm 29,15 điêm.

Minh Anih thi tốt nghiệp THPT đơt 1 tơ̆ dêh char Kon Tum

Tơ̆ Dak Nông đei kơ sô̆ hŏk tro đŏu tốt nghiệp THPT sơ năm 2021 đei 97,1%, hăm 6.702 'nu hŏk tro vang thi. Lơ̆m nŏh, 10 hnam trưng đĭ đăng hŏk tro đŏu tốt nghiệp ngăl. Kiơ̆ kơ sô̆ chih jô̆, đei 80 ƀai thi đei điêm lơ rim môn đơ̆ng 9,25 điêm tŏk tơ̆ kơ pal. Lơ̆m nŏh, đei 57 ƀai đei điêm 10 'nŏh: Giáo dục công dân 50 ƀai, nơ̆r  Anh 4 ƀai păng Sinh hŏk 3 ƀai.

Oei tơ̆ Dak Lak, kơ sô̆ hŏk tro thi đŏu tốt nghiệp đơt 1 kơ dêh char Dak Lak kŭm đei 97,01%, tŏk 0,6% pơ têng hăm sơ năm 2020. Đei 10 hnam trưng THPT păng 3 anih pơ tho pơ hrăm (lơ̆m kơ sô̆ 58 hnam trưng THPT păng 15 anih pơ tho tơ drong jang – pơ tho hŏk pơ hrăm hơ nơ̆ng) hŏk tro thi đŏu ngăl. Kiơ̆ kơ sô̆ chih jô̆ đơ̆ng Anih vei lăng pơ tho pơ hrăm Dak Lak, lơ̆m dêh char đei 292 hŏk tro đei điêm đơ̆ng 9,5 điêm tŏk tơ̆ kơ pal hăm dôm môn hơ drô̆.

Dơ̆ng: Tơ blơ̆