VOV4.Bahnar - Anih vei lăng kon pơ lei kơ pơ lei tơm Buôn Ma Thuột, dêh char Dak Lak hlôi đei hla ar ăn phep tơ mơ̆t yua 1,2 trong jang tang găn jĭ Covid -19 lơ̆m pơ lei tơm. Kiơ̆ kơ ‘noh, pơ tơm blŭng đơ̆ng 6 jơ ‘năr 6/1 Anih vei lăng kon pơ lei kơ pơ lei tơm Buôn Ma Thuột gô ăn pơ gơ̆r rim tơ drong jang lơ̆m hnam, tơ̆ ‘ngoăih, mă lei: akŏm ưh kơ hloh 60 ‘nu lơ̆m 1 hơ nih păng hloh 90% ‘nu bơ ngai vang akŏm đei ƀet tôm 2 jrŭm dăh mă klăih đơ̆ng jĭ Covid-19 ưh kơ hloh 6 khei, vei sơ đơ̆ng jang kiơ̆ 5K. Hơ drô̆ pơ gơ̆r hơ pong kơ nê̆ hơ kâu, et pơ kong ưh kơ ăn lơ bơ ngai vang akŏm păng đei dăr hơ len đơ̆ng khŭl kơ dră tơ ring. Ăn gre chơ tơ moi kơ dâu lơ̆m pơ lei tơm păng lơ dêh char,  gre buýt, taxi, gre thuê, gre chơ tơ mang lăng; rim hơ nih tĕch mơ dro et sa gơh tĕch hơ lơ̆k dơ̆ng mă lei athei pơm kiơ̆ dôm trong jang vei sơ đơ̆ng tang găn jĭ. Hơ drô̆ rim hơ nih tĕch mơ dro et sa lăp gơh pơ vih pơ văn ưh kơ hloh 20 ‘nu tơ moi lơ̆m 1 hơ nih. Hăm tơ drong năm hŏk hơ lơ̆k dơ̆ng, hla ar chih athei pơ dơh ‘mơ̆i hăm jăl mầm non. Pơ gơ̆r pơ tho hŏk kơ tă hăm lăm 9 păng lăm 12, jô̆ đơ̆ng ‘năr 10/01/2022.  Hăm dôm grŭp lăm jăl 1,2,3 uơ oei dơ̆ng hơ nơ̆ng pơ gơ̆r hŏk kiơ̆ trong trực tuyến.

Thuem: Tơ blơ̆