VOV4.Bahnar -  Hơnơ̆ng pơgơ̆r hop akŏm mă 4, pơgê năr 12/10, Dơnŏ anĭh chĕp pơgơ̆r Kuô̆k hô̆i pơgơ̆r hop akŏm hrĕp, ăn tơgop nơ̆r găh rim hla bơar chĭh tơbăt bơ̆ jang đơ̆ng Khŭl kơdră Tĕh đak găh pơtôch jang kiơ̆ trong vă jang atŏk tơ iung mŭk drăm - tơpôl păng kon jên jang tĕh đak sơnăm 2021, trong pơ prŏ jang atŏk tơ iung mŭk drăm-tơpôl sơnăm 2022; kon jên bơ̆ jang tĕh đak păng trong bơ̆ jang klăh asong kon jên jang Trung ương sơnăm 2022.

Rup hop akŏm kơ Dơnŏ chĭh chĕp pơgơ̆r Kuô̆k hô̆i

Trong tơlĕch jang mă tơdrong pơ prŏ vă jang hơmet ming dơ̆ng jang mŭk drăm jăl jang 2021-2025 ‘nŏh pơjing tơdrong tơplĭh hơdăh lơ̆m trong jang tŏk kơtang kiơ̆ ‘moi kiơ̆ lơ̆m jang sa đei iŏk yua lơ, ‘lơ̆ng, kĕ pơjei. Adoi atŏk kơtang iŏk đei jơnei hơ iă lơ̆m tơmơ̆t jang, kĕ gei kơ jăp kiơ̆ chăl jang mŭk drăm hle; ƀrư̆ ƀrư̆ yak trŭh jang mŭk drăm gơnang lơ̆m khoa hŏk păng măi kmŏk, tơplĭh ‘nao trong tơchăr, sơđơ̆ng atŏk tơ iung tĕnh koăng păng kơ jăp. Atŭm hăm ‘nŏh, hơmet ming trong jang tơm, pơjing đei trong jang hơ iă păng bơ̆ jang hơmet ming ‘lơ̆ng liĕm vă kĕ tang găn hơlau dôm tơdrong đei ƀơm đơ̆ng ‘ngoăih.

Tơblơ̆ nơ̆r: Amazưt