VOV4.Bahnar - Pơgê brei, năr 22/3, ƀok Bùi Tuấn Quang-Kơ iĕng Kơdră chĕp pơgơ̆r Dơnŏ anĭh bơ̆ jang Pơrô̆ pơrôp Trung ương hlôi đei jơ bơ̆ jang hăm Dơnŏ anih Đảng pơlei tơm Pleiku, dêh char Gia Lai găh pơtôch jang kiơ̆ Nơ̆r sơkơ̆t hơdăh kơsô̆ 120-KL/TW đơ̆ng Dơnŏ anĭh tơm Chĭnh trĭ găh hơnơ̆ng atŏk kơtang bơ̆ jang ‘lơ̆ng, jơnei kơ tơdrong tơ iung pơjing păng jang kiơ̆ nơ̆r pơkăp hơtŏ hơnơ̆ng tơ̆ tơring. Khei năr au ki, khŭl kơdră chĕp pơgơ̆r đảng, kơdră chĕp pơgơ̆r tơring, MTTQ, rim khŭl jang chĭnh trĭ-tơpôl tơ̆ pơlei tơm Pleiku hlôi tơlĕch jang kiơ̆ ‘lơ̆ng hơtŏ hơnơ̆ng tơ̆ tơring. Hrei au, 22 tơring, phương păng rim hơnĭh bơ̆ jang kơ plei tơm hlôi hơmet pơ ‘lơ̆ng Hơnĭh chĕp pơgơ̆r, pơjing tơlĕch trong pơkăp bơ̆ jang păng pơjao tơdrong jang ăn rim kơdră kiơ̆ tơdrong pơkăp. Iung pơma pơtôch jơ bơ̆ jang, Kơ iĕng Kơdră chĕp pơgơ̆r Dơnŏ anĭh bơ̆ jang Pơrô̆ pơrôp Trung ương Bùi Tuấn Quang pơma hơdăh, khei năr kơnh, pơlei tơm hơnơ̆ng tơlĕch jang kiơ̆ Nơ̆r sơkơ̆t hơdăh kơsô̆ 120 păng rim hla bơar tơchơ̆t đei ƀơm trŭh găh tơdrong hơtŏ hơnơ̆ng mă tôm tong; atŏk kơtang hơmet pơ ‘lơ̆ng tơdrong bơ̆ jang, mă kăl tơdrong sơng pơma dơnŭh hăm kon pơlei.

Tơblơ̆ nơ̆r: Amazưt