VOV4.Bahnar - Iung pơma pơgơ̆r blŭng a ‘Măng hop akŏm mă 4 kơ Dơnŏ anĭh chĕp pơgơ̆r Kuô̆k hô̆i pơgê năr 11/10, Kơdră chĕp pơgơ̆r Kuô̆k hô̆i Vương Đình Huệ pơma hơdăh dôm tơdrong ăn tơgop nơ̆r tơ̆ hop akŏm. Mă kăl, tơ̆ hop akŏm au, Dơnŏ anĭh chĕp pơgơ̆r Kuô̆k hô̆i jei ăn tơgop nơ̆r găh Trong pơ prŏ hơmet ming dơ̆ng tơdrong jang mŭk drăm jăl jang 2021-2025; tơdrong pơprŏ iŏk yua tĕh kơ tĕh đak jăl jang 2021-2030, lăng trŭh sơnăm 2050 păng trong pơ prŏ jang iŏk yua tĕh lơ̆m 5 sơnăm (2021-2025).

Pơgơ̆r blŭng a ‘măng hop akŏm mă 4 kơ Dơnŏ anĭh chĕp pơgơ̆r Kuô̆k hô̆i

‘Măng hop akŏm ăn tơgop nơ̆r găh tơdrong hơmet ăn ‘măng hop akŏm mă 3, lơ̆m au đei tơlĕch ăn mĭnh ƀar tơdrong tơplĭh ‘nao, hơmet ming jang kiơ̆ tơ̆ ‘măng hop akŏm mă 2 păng tơdrong pơgơ̆r apĭnh păng tơl nơ̆r apĭnh tơ̆ ‘măng hop akŏm. Lơ̆m tơbăt hơdăh akŏm nơ̆r tơgop đơ̆ng bơngai tăh hla păng kon pơlei pơtrŭh ăn ‘măng hop akŏm mă 2, bơngai tăh hla ‘mĕh vă lăng tơpăt tơdrong tơpă yan au, hơmet pơ ‘lơ̆ng kơtang hăm mĭnh ƀar tơdrong pơrô̆ jang tim mă ƀlep hăm tơdrong yan au, dôm tơdrong oei mơ suơ̆l mơ soăl, jang kiơ̆ hiơ hiơ̆. ‘Mĕh vă Khŭl kơdră Tĕh đak, rim tơring pơjing rơvơn ăn tơdrong tĕch mơdro tơmam drăm, chơ tơmam drăm vă sơđơ̆ng vei kơ jăp chŏh jang sa, pơm tơlĕch, tĕch mơdro tơmam drăm.

Tơblơ̆ nơ̆r: Amazưt