VOV4.Bahnar - Ăn tơgop nơ̆r hơmet ăn hop akŏm hăt hot kơ Kuô̆k hô̆i jăl XV, Dơnŏ anĭh chĕp pơgơ̆r Kuô̆k hô̆i pơma hơdăh kăl sơđơ̆ng ‘lơ̆ng, sơđơ̆ng ƀlep trong tơlĕch ăn ‘nŏh mă pơgơ̆r hop akŏm. 4 tơdrong gô vă pơtrŭh ăn Kuô̆k hô̆i tơ̆ hop akŏm hăt hot đei: Tơdrong vă jang Khôi luơ̆t hơmet ming, tơmơ̆6t dơ̆ng mĭnh ƀar apăng kơ mĭnh ƀar Khôi luơ̆t; Tơdrong vă jang ming man trong gre rĕnh Tu-Pơbăh găh Hơlĕch jăl jang 2021-2025; Hla bơar chĭh tơbăt đơ̆ng Khŭl kơdră tĕh đak găh trong jang, trong bơ̆ jang, jên hu vă tơgŭm tơtom tơlĕch jang Tơdrong jang hơmet ming păng atŏk tơ iung mŭk drăm-tơpôl; Tơdrong vă jang Tơchơt Pơlong năng mĭnh ƀar trong jang kăl atŏk tơ iung pơlei tơm Cần Thơ. Kơdră dơnơm, Kơdră chĕp pơgơ̆r Dơnŏ anĭh bơ̆ jang ăn Khŭl kơdră Tĕh đak Trần Văn Sơn tơbăt: 4 tơdrong au hrei au hlôi tôm tong vă pơtrŭh ăn Kuô̆k hô̆i. Tơ̆ hop akŏm, Kơdră chĕp pơgơ̆r Kuô̆k hô̆i Vương Đình Huệ athei Khŭl kơdră tĕh đak păng rim hơnĭh bơ̆ jang kơ Kuô̆k hô̆i iung jang hơdoi kơ jăp vă drơ̆ng mĭnh nơ̆r. Mư̆h Dơbnŏ anĭh bơ̆ jang Kuô̆k hô̆i păng Khŭl kơdră tĕh đak lăp mĭnh đon kơtang,  pơtrŭh ăn Kuô̆k hô̆i gô iŏk đei tơdrong lăp mĭnh đon kơtang. Iung pơma pơtôch ‘măng mă 1 hop akŏm mă 6, Kơdră chĕp pơgơ̆r Kuô̆k hô̆i tơbăt: Dơnŏ anĭh bơ̆ jang Kuô̆k hô̆i drơ̆ng mĭnh nơ̆r trong pơgơ̆r ‘măng hop akŏm hăt hot kơ Kuô̆k hô̆i jăl XV, mă lei kăl sơđơ̆ng găh tơdrong ‘lơ̆ng hơ iă rim tơdrong pơtrŭh ăn tơ̆ Kuô̆k hô̆i.

Tơblơ̆ nơ̆r: Amazưt