VOV4.Bahnar - Hơnơ̆ng bơ̆ jang hop akŏm mă 6, pơgê năr 10/12, ăn tơgop nơ̆r găh trong jang tơmơ̆t jên jang Tơdrong vă jang tơ iung pơjing ming man trong gre renh Tu-Pơbăh găh hơlĕch jăl jang 2021-2025, Dơnŏ anĭh chĕp pơgơ̆r Kuô̆k hô̆i athei lăng hơlen păng tơbăt mă hơdăh hlŏh dơ̆ng trong vă jang tơmơ̆t jên jang pơm 4 trong gre kơdau hăm trong să 24,75 m pơtêng hăm pơm  4 trong gre kơdau hăm trong să 17 met vă sơđơ̆ng ăn gre kơdau ‘lơ̆ng hơ iă. Dơnŏ anĭh chĕp pơgơ̆r Kuô̆k hôi drơ̆ng mĭnh nơ̆r pơtrŭh ăn Kuô̆k hô̆i lăng hơlen kĭ tơchơ̆t tơdrong tơmơ̆t jên jang pơ đĭ Tơdrong vă jang au hăm kon jên jang kơ tĕh đak. Adoi hơmet pơ ‘lơ̆ng trong pơ prŏ vă tơmơ̆t jên jang tơdrong jang pơm trong gre rĕnh Tu-Pơbăh găh Hơlĕch jăl jang 2024-2025. Pơtrŭh ăn Kuô̆k hô̆i pơjao ăn Dơnŏ anĭh chĕp pơgơ̆r Kuô̆k hô̆i lăng hơlen, kĭ tơchơ̆t tơdrong tơ plĭh iŏk yua tĕh bri kơ tơdrong vă jang lơ̆m trong tơchĕng hơlen vă tơ iung pơjing ming man.  Jei lơ̆m năr 10/12, Dơnŏ anĭh chĕp pơgơ̆r Kuô̆k hô̆i ăn tơgop nơ̆r hơmet ăn hop akŏm hăt hot kơ Kuô̆k hô̆i ‘măng mă 15.

Tơblơ̆ nơ̆r: Amazưt