VOV4.Bahnar - Lơ̆m kơsơ̆ năr 15/3, Dơnŏ anih chĕp pơgơ̆r Kuô̆k hô̆i ăn tơgop nơ̆r găh hla bơar tơbăt bơ̆ jang pơtôch dăr lăng tơdrong xek tơlang nơ̆r tơgop, nơ̆r apĭnh athei đơ̆ng bơngai tăh hla pơtruh ăn hop akŏm mă 10, Kuô̆k hô̆i jăl 14; hla bơar chih akŏm nơ̆r tơgop, nơ̆r athei đơ̆ng bơngai tăh hla păng Kon pơlei pơtrŭh ăn ‘măng hop akŏm mă 11, Kuô̆k hô̆i jăl 14. Dơnŏ anih chĕp pơgơ̆r Kuô̆k hô̆i hơlen: 5 tơdrong tơm găh jơhngơ̆m đon hơpơi ‘mĕh vă đơ̆ng bơngai tăh hla păng kon pơlei chă tơgop ‘nŏh tôch kơ ƀlep, tôch kơ lăp, jei rim tơdrong tih kơ tơpôl đei kon pơlei păng bơngai tăh hla lăng trŭh. ‘Ngoăih tơdrong ƀlep, tơdrong ‘lơ̆ng păng tơdrong tim mă ƀlep, Hla bơar chih tơbăt tơdrong bơ̆ jang jei tơlĕch hơdăh minh ƀar tơdrong kăl đei trong jang hloi vă xek tơlang tơtom, keh đang, sơđơ̆ng ăn tôm tong, athei kăl hơnơ̆ng dăr lăng hơlen hlŏh dơ̆ng. Dơnŏ anih chĕp pơgơ̆r Kuô̆k hô̆i, drơ̆ng kiơ̆ hăm 5 tơdrong tơm athei, tơlech ăn hlôi đei chih akŏm, lơ̆m au đei lơ tơdrong đei ƀơm trŭh tơdrong tơlĕch jang kiơ̆ Tơchơ̆t pơm lê̆h hop akŏm Đảng ‘măng mă 13. Hơmet ăn păng pơgơ̆r ‘lơ̆ng keh kong pôk rơ̆ih kơdră tang măt Kuô̆k hô̆i jăl 15 păng Jơnŭm vei lăng kon pơlei rim hơnih jăl jang 2021-2026. Pơma pơtôch hop akŏm 54, Kơdră chĕp pơgơ̆r Kuô̆k hô̆i Nguyễn Thị Kim Ngân pơma hơdăh: mĭnh tơdrong tôch gĭt kăl ‘nŏh bơ̆ jang hơlen khŭl kơdră chĕp pơgơ̆r vă tơchơ̆t hơdăh kơchư̆k chĕp pơgơr tơ̆ hop akŏm mă 11, athei rim hơnih bơ̆ jang hơmet ăn mă ‘lơ̆ng păng mă kăl ‘nŏh dôm trong bơ̆ jang tơ ƀô̆h ăn, pôk tơmơ̆t, tăh hla tơlĕch păng tơchơ̆t vă sơđơ̆ng ƀlep hăm Khôi luơ̆t tơm tĕh đak păng Khôi luơ̆t.

Tơblơ̆ nơ̆r: Amazưt