VOV4.Bahnar - Vaccine tang găn jĭ Covid-19 tŏk bŏk vĭh tơ̆ Việt Nam hăm đei lơ, mă lei lơ kơ loăi. Dơnŏ anĭh tơm vei lăng jang pơgang kăl klăh asong mă trŏ ƀlep ăn rim tơring sơđơ̆ng ăn tơdrong ƀet bơ̆ng, mă kăl tơ̆ rim dêh char tơring miền Tây păng tơring Tây Nguyên mă dang ei tŏk bŏk đei jĭ hơbŭh pơrăm kơtang. ‘Nau jĭ mĭnh lơ̆m dôm tơdrong tơm mă Dơnŏ anĭh chĕp pơgơ̆r tĕh đak tang găn jĭ Covid-19 pơma hơdăh tơ̆ hop akŏm pơgơ̆r pơgê năr brei, năr 3/11 tơ̆ Hơnĭh bơ̆ jang Khŭl kơdră chĕp pơgơ̆r Tĕh đak, pơma dơnŭh găh Trong jang tơm iung tơ jră tang găn jơnei jĭ hơbŭh Covid-19. Kơ iĕng Thủ tướng Vũ Đức Đam, Kơ iĕng Kơdră chĕp pơgơ̆r Dơnŏ anih chĕp pơgơ̆r tĕh đak tang găn jĭ Covid-19 pơm tơm hop akŏm. Kơ iĕng Thủ tướng Vũ Đức Đam, Trong jang tơm au hăm dôm trong jang ‘nao lơ̆m khei năr kơnh gô đei tơlĕch jang kiơ̆ mư̆h hlôi đei ƀet bơ̆ng vaccine lơ. Găh dang ei kăl oei jang kiơ̆ tang găn, vat tơring, ăn oei hơdrô̆ păng tim mă hŭt trong jang ăn oei hơtăih dĭh băl, pơvang tang găn kiơ̆ Nơ̆r athei jang kiơ̆ 16.

Tơblơ̆ nơ̆r: Amazưt