VOV4.Bahnar - Năr brei, năr 31/3, tơ̆ hơnĭh tơm bơ̆ jang vei lăng Mơ̆t oei găh Dơnŏ anĭh tơm vei lăng sơđơ̆ng, Hơnĭh tơm Phnôm Pênh,  hlôi pơgơ̆r pôk ăn tơmam drăm jang pơgang đơ̆ng Dơnŏ anĭh tang măt tĕh đak Việt Nam tơ̆ Campuchia tơgŭm djru kon pơlei Campuchia tang găn jĭ Covid-19. Iung pơma tơ̆ jơ pơm lê̆h, Kơdră tang măt tĕh đak Lại Xuân Chiến pơma hơdăh, tơdrong jĭ Covid-19 tŏk bŏk pơrăm lơ̆m apŭng plĕnh tĕh, pơm kơnê̆ kơtang hăm Việt Nam păng Campuchia. Kơ yuơ lơ lŏh, Dơnŏ anĭh tang măt Việt Nam ‘măn pôk ăn 10.000 blăh che gom mŭh măt ăn Hơnĭh tơm vei lăng Mơ̆t oei Campuchia. Tơmam au jing jơhngơ̆m đon ‘mêm kơ eng đơ̆ng Dơnŏ anĭh tang măt pơma hơdrô̆ păng kon pơlei Việt Nam pơma atŭm ‘mĕh vă tơgŭm djru kon pơlei Campuchia yak hlŏh tơdrong tơnap tap, tang găn kĕ jĭ hơbŭh Covid-19, adoi tơgop hơmet pơ ‘lơ̆ng dơ̆ng tơdrong tơgoăt tơgoăl pôm nơ̆r ƀơ̆r đon ‘lơ̆ng hơ iă ƀar păh kon pơlei ƀar tĕh đak.

Tơblơ̆ nơ̆r: Amazưt