VOV4.Bahnar - Hơnĭh Đảng Ƀô̆ đô̆i Trung ương - găh Dơnŏ anĭh tơm Ƀô̆ đô̆i vei lăng sơlam tĕh đak pơgơ̆r Pơm lê̆h tơlĕch Tơdrong jang pơting dĭh băl jang pran kơtang gĭt kăl hăm hơnăn “Ƀô đô̆i atŭm hăm tĕh đak kơrŭn jơhngơ̆m, mĭnh jơhngơ̆m đon tang găn păng tang găn kĕ jĭ hơbŭh Covid-19”. Đại tướng Phan Văn Giang, Yŏng Khŭl ƀô̆ đô̆i pơrô̆ tơ̆ jơ pơm lê̆h tơ̆ hơnĭh pơgơ̆r tơm Dơnŏ anĭh tơm chĕp pơgơ̆r Khŭl ƀô̆ đô̆i vei lăng sơlam tĕh đak atŭm hăm 220 hơnĭh pơdăh hop akŏm lơ̆m tĕh đak. Tơdrong jang pơting dĭh băl jang pran kơtang gĭt kăl ““Ƀô đô̆i atŭm hăm tĕh đak kơrŭn jơhngơ̆m, mĭnh jơhngơ̆m đon tang găn păng tang găn kĕ jĭ hơbŭh Covid-19” akŏm lơ̆m bơ̆ jang hơdoi, tơgŭm djru khŭl kơdră đảng, kơdră chĕp pơgơ̆r tơring hơmet pơ ‘lơ̆ng tơnap tap, tơgŭm kon pơlei chă kĕch yoă ƀa, ƀŭch phĕ tơmam drăm chŏh pơtăm păng răt iŏk tơmam drăm chŏh jang sa, tĕch ăn tơmam drăm kăl tơgŭm ăn erĭh sa păng vei lăng năng tông jơhngơ̆m jăn kon pơlei; hơmet pơ ‘lơ̆ng trong jang tang găn jĭ, tơ jră tang găn tơtom dôm tơdrong đei ƀô̆h ư̆h hơ iă. Lơ̆m năr mă blŭng tơlĕch jang, 1.096 ‘nu kang ƀô̆, bơngai hŏk jang pơgang kơ hnam trương ƀok thây pơgang ƀô̆ đô̆i hơnơ̆ng atŏk kơtang năm bơ̆ jang tơ̆ pơlei tơm Hồ Chí Minh păng rim dêh char găh Pơbăh vă vang tang găn jĭ hơbŭh Covid 19.

Tơblơ̆ nơ̆r: Amazưt