VOV4.Bahnar - Tang măt ăn Dơnŏ anĭh tơm Chĭnh trĭ, Tổng Bí thư Nguyễn Phú Trọng hlôi kĭ tơlĕch Tơdrong tơchơ̆t 02 kơ Dơnŏ anĭh tơm Chĭnh trĭ găh tơplĭh ‘nao chĕp pơgơ̆r păng bơ̆ jang kơ Công đoàn Việt Nam lơ̆m chăl ‘nao. Hăm trong tơm ‘nŏh tơ iung pơjing Công đoàn Việt Nam pran kơtang tôm tong, kĕ iung jang păng xek tơlang rim tơdrong tơlĕch ăn, jang kiơ̆ ‘lơ̆ng hơnăp jang, tơdrong jang lơ̆m chăl ‘nao; ‘nŏh hơnĭh jang chinh trĭ - tơpôl kơ jăp kơ Đảng, Tĕh đak; jang ‘lơ̆ng hơnăp jang pơm gơng tơrŏh klŏh klĕch, vei kơ jăp tơgoăt tơgoăl ‘lơ̆ng ƀar păh Đảng, tĕh đak hăm khŭl kŏng nhân, bơngai jang; tơgăl jing hơnĭh jang tang măt tĭh hlŏh, hơnĭh tơm akŏm, tơgoăt tơgoăl khŭl kŏng nhân păng bơngai jang lơ̆m tĕh đak; tơgop tơ iung pơjing khŭl kŏng nhân Việt Nam gơ̆h hơgei, pran kơtang, jing khŭl pơm jŭk yŭk trong hơlau lơ̆m jang kiơ̆ tơdrong jang atŏk tơ iung păng kơ jăp ‘lơ̆ng tĕh đak. Tơdrong tơchơ̆t tơlĕch ăn rim trong jang hơdăh trŭh sơnăm 2025: Hơdrin đei 13 trĭu 500.000 ‘nu bơngai jang lơ̆m Công đoàn, đĭ đăng hơnĭh mơdro sa tơm đei 25 kŏng nhân, bơngai jang năm tơ̆ lơ đei khŭl Công đoàn; trŭh sơnăm 2023 hơdrin đei 12 trĭu ‘nu bơngai jang lơ̆m Công đoàn. Trŭh sơnăm 2030: đei 16 trĭu 500.000 ‘nu bơngai jang lơ̆m Công đoàn ... Hơdrin 85% năm tơ lơ rim Hơnĭh mơdro sa tơm, hơnĭh bơ̆ jang đei khŭl Công đoàn kĭ pơkăp drơ̆ng nơ̆r bơ̆ jang tơpôl. Trŭh sơnăm 2045: Đĭ đăng bơngai jang tơ̆ rim hơnĭh ‘nŏh bơngai mơ̆t lơ̆m Công đoàn Việt Nam; 99% hơnĭh mơdro sa, hơnĭh bơ̆ jang đei khŭl Công đoàn kĭ pơkăp drơ̆ng mĭnh nơ̆r bơ̆ jang tơpôl.

Tơblơ̆ nơ̆r: Amazưt