VOV4.Bahnar - Pơgê năr 12/5, Dơnŏ anĭh tơm Kŏng ang pơgơ̆r hop akŏm trư̆k tuyên lơ̆m tĕh đak pơjao tơdrong jang păng tơlĕch tơdrong tơchơ̆t iung jang vei lăng sơđơ̆ng dơ̆ng kơ jăp Năr pôk rơ̆ih Kơdră tang măt Kuô̆k hô̆i jăl XV păng Jơnŭm vei lăng kon pơlei jăl jang 2021-2026.

Kơdră chĕp pơgơ̆r Kuô̆k hô̆i Vương Đình Huệ pơma tơ̆ hop akŏm

Vang năm păng iung pơma pơrô̆ lơ̆m hop akŏm, Kơdră chĕp pơgơ̆r Kuô̆k hô̆i, Kơdră Jơnŭm vei lăng pôk rơ̆ih tĕh đak Vương Đình Huệ hôn bơnê kơtang dôm tơdrong jơnei, iŏk đei, tơdrong iung jang đĭ jơhngơ̆m đơ̆ng khŭl Kŏng ang kon pơlei păng rim khŭl lơ̆m tơlĕch jang rim tơdrong vei lăng sơđơ̆ng dơ̆ng kơ jăp Năr pôk rơ̆ih-Năr lê̆h kơ kon pơlei, iung jang tơgŭm jơnei ‘măng pôk rơ̆ih. Ƀok Đình Huệ pơma hơdăh kăl hơnơ̆ng tơlĕch jang kơ jăp tơdrong vei lăng năng tông ‘lơ̆ng kơ jăp ăn pôk rơ̆ih. Dơnŏ anĭh tơm Kŏng ang hơnơ̆ng jang hơdoi kơ jăp hăm rim hơnĭh bơ̆ jang kơ Jơnŭm vei lăng Pôk rơ̆ih tĕh đak, Dơnŏ anĭh tơm Ƀô̆ đô̆i vei lăng sơlam tĕh đak, Dơnŏ anĭh tơm vei lăng jang pơgang, Dơnŏ anĭh Đảng dêh char, pơlei tơm, Dơnŏ anĭh vei lăng kon pơlei, Dơnŏ anih vei lăng pôk rơih rim hơnĭh dăr lăng kơ jăp rim tơdrong jang pơm sơđơ̆ng dơ̆ng kơ jăp păng jang tơgŭm jơnei Năr pôk rơ̆ih.

Tơblơ̆ nơ̆r: Amazưt