VOV4.Bahnar - Hơnĭh bơ̆ jang vei lăng sơđơ̆ng mạng păng tang găn, tơ jră khŭl yoch iŏk yua kmăi kmŏk hơgei Dơnŏ anĭh tơm Kŏng ang tơbăt, hơnĭh au ‘nao pơm tơm, iung jang hơdoi hăm Kŏng ang pơlei tơm Hà Nội pơrăm khŭl kă đô̆ đă ƀŏng lŏng tơplŏng kơdau sa jên tôch kơ lơ lơ̆m Hơnĭh tơm ‘moi kiơ̆ trang web bong88.com. Lăp jô̆ hơdrô̆ đơ̆ng blŭng sơnăm 2020 trŭh dang ei kon jên kla ăn dĭh băl đơ̆ng kă đô̆ đă ƀŏng lŏng tơplŏng kơdau sa jên trŭh 1.500 ti hlak jên. Hơnĭh bơ̆ jang vei lăng sơđơ̆ng mạng păng tang găn, tơ jră khŭl yoch iŏk yua kmăi kmŏk hơgei hlôi iung jang hơdoi hăm Kŏng ang pơlei tơm Hà Nội hơvơn kơ hrĕng ‘nu kang ƀô̆, kŏng ang klăh asong 18 khŭl bơ̆ jang năm mơ̆t lăng hơlen tơ̆ 18 hơnĭh đei ƀơm trŭh; krao hơvơn, apŭng hơlen hăm 17 ‘nu bơngai. Hlŏh đơ̆ng apĭnh hơlen, ‘măng mă blŭng rim bơngai au hlôi drơ̆ng nơ̆r akhan đe sư hlôi pơgơ̆r kă đô̆ đă ƀŏng lŏng tơplŏng kơdau sa jên ‘moi kiơ̆ trang web bong88.com (‘nŏh trang web kă đô̆ đă ƀŏng lŏng tơplŏng kơdau sa jên  trư̆k tuyên đei kmăi tơm pơlăp tơ tĕh đak Mi). Hlŏh đơ̆ng lăng hơlen lơ̆m kmăi đei ƀô̆h kă đô̆ đă ƀŏng lŏng tơplŏng kơdau, hơnĭh bơ̆ jang ‘măng mă blŭng hơlen ƀô̆h tơdrong kla ăn dĭh băl kă đô̆ đă ƀŏng lŏng tơplŏng kơdau au hơtŏ hăm 1.500 ti hlak jên.

Tơblơ̆ nơ̆r: Amazưt