VOV4.Bahnar - Drung kơsơ̆ năr 12/7, tơ̆ Hà Nội, Đại tướng Tô Lâm, Kơdră chĕp pơgơ̆r Dơnŏ anĭh tơm Kŏng ang hlôi pơma đam trư̆k tuyên hăm ƀok Ajit Kumar Doval, Kơdră jang tơgŭm ăn Hơnĭh jang vei lăng Sơđơ̆ng tĕh đak Cộng hòa Ấn Độ. Tơ̆ pơma dơnŭh ƀar păh ‘mĕh vă hơnơ̆ng atŏk kơtang jang hơdoi tơbăt dĭh băl kơtơ̆ng ang, tơbăt nơ̆r athei jang đơ̆ng kơdră kơpal, iung jang hơdoi, tơgŭm djru dĭh băl tơ̆ rim ‘măng hop akŏm apŭng plĕnh tĕh adoi nhen lơ̆m xek tơlang rim tơdrong mă ƀar păh lăng trŭh. Iung pơma tơ̆ pơma đam, Kơdră jang tơgŭm Dơnŏ anĭh vei lăng sơđơ̆ng Tĕh đak Cộng hòa Ấn Độ Ajit Kumar Doval sơkơ̆t hơdăh, Jơnŭm vei lăng sơđơ̆ng Tĕh đak Ấn Độ ling lang lăng kơ jăp păng vei kơ jăp, atŏk tơ iung tơgoăt tơgoăl dĭh băl ‘lơ̆ng hơ iă đơ̆ng sơ̆ kơ ƀar tĕh đak, atŏk kơtang, pơ̆ih să tơgoăt tơgoăl jang hơdoi hăm Dơnŏ anĭh tơm Kŏng ang Việt Nam lơ̆m rim tơdrong jang. Ƀar păh hơnơ̆ng pơgơ̆r jơnei Pơma dơnŭh găh Vei lăng sơđơ̆ng kơ ƀar păh Kơ iĕng Kơdră chĕp pơgơ̆r ƀar păh ‘măng mă ƀar pơgơ̆r tơ̆ Ấn Độ; Atŏk kơtang jang hơdoi tang găn khŭl chư̆ kơnê̆, khŭl yoch klŏh klĕch tĕh đak, khŭl yoch iŏk yua kơmăi kmŏk hơgei, pơm pơ ‘lơ̆ng jên đơ̆ng jang kơnê̆, khŭl yoch găh ma tuý; Pơtrŭt kơtang jang hơdoi pơtho pơhrrăm ming ăn kang ƀô̆ joăt jang kmăi kmŏk kơtơ̆ng ang, khoa hŏk găh bơ̆ jang hơlen tơdrong yoch.

Tơblơ̆ nơ̆r: Amazưt