VOV4.Bahnar - Kơsơ̆ năr 11/6, Dơnŏ anĭh tơm vei lăng jang jên hu pơgơ̆r pơm lê̆h sơng iŏk kon jên tơgŭm lơ̆m Hơnĭh mong răk vaccine tang găn Covid-19 đơ̆ng mĭnh ƀar hơnĭh jang păng hơnĭh mơdro sa. Kơdră chĕp pơgơ̆r Dơnŏ anĭh tơm vei lăng jang jên hu Hồ Đức Phớc hlôi vang năm păng pơjao ăn Hla bơar drơ̆ng đei tơgŭm ăn rim bơngai tơgŭm djru. Tơ̆ pơm lê̆h, Kơdră chĕp pơgơ̆r Dơnŏ anĭh tơm vei lăng jang jên hu Hồ Đức Phớc hăm kơdră chĕp pơgơ̆r Hơnĭh mong răk hlôi sơng iŏk tơdrong tơgŭm đơ̆ng 5 ‘nu bơngai tơgŭm djru hăm kon jên 320 ti hlak jên. Tang măt ăn kang ƀô̆ khŭl bơ̆ jang kơ Hơnĭh bơ̆ jang hjênj hu Tĕh đak, Kơdră chĕp pơgơ̆r tơm Nguyễn Đức Chi jei hlôi pôk ăn lơ̆m Hơnĭh mong jên vang tơgop 3 ti 450 trĭu hlak jên. Kơdră chĕp pơgơ̆r Dơnŏ anĭh bơ̆ jang vei lăng jên hu Hồ Đức Phớc hơlen: lơ̆m khei ‘năr pơm tơlĕch, tĕch mơdro kơ hơnĭh jang mơdro sa tơ ƀơ̆p lơ tơdrong tơnap tap kơ yuơ jĭ hơbŭh Covid-19, lơ hơnĭh mơdro sa hlôi hơdrin đĭ ai tơlĕch pơ kom kon jên jang, ưh khan lăp vă sơđơ̆ng ăn tơdrong jang, mă lei oei tơlĕch kon jên vang tơgop lơ̆m Hơnĭh mong răk vaccine tang găn jĭ Covid-19 dơ̆ng.

Tơblơ̆ nơ̆r: Amazưt