VOV4.Bahnar -  Pơm tơm ‘măng hop akŏm Dơnŏ anĭh chep pơgơ̆r Tĕh đak tang găn jĭ Covid-19 pơgơ̆r kơsơ̆ brei, năr 21/5 tơ̆ Hơnĭh bơ̆ jang Khŭl kơdră Tĕh đak, Kơ iĕng Thủ tướng Vũ Đức Đam, Kơdră chĕp pơgơ̆r Dơnŏ anĭh chĕp pơgơ̆r Tĕh đak tang găn jĭ athei dêh char Bắc Giang vei lăng kơ jăp măt bơngai kŏng nhân lơ̆m tơring ăn oei hơdrô̆ tơpôl, găn ga kơtang pơm dă ƀiơ̆ tơpŏh tơ̆ pơlei pơla. Dêh char Bắc Giang oei tŏk bŏk jing tơring đei tơpŏh jĭ kơtang hlŏh. Dang ei đei hlŏh 12.000 ‘nu bơngai jang đơ̆ng dêh char anai tŏk bŏk oei lơ̆m rim hơnĭh ăn oei hơdrô̆ kơ dêh char Bắc Giang. Tơring hlôi pơjing Khŭl jang tơgŭm djru tơdrong erĭh sa ăn dôm kŏng nhân au. Tơdrong kăl lăng trŭh hrei au ‘nŏh pơm lơ liơ vă tơgŭm ăn dôm hơnĭh mơdro sa găh khŭl pơm tơlĕch tĕch mơdro ăn rim Grŭp jang tĭh nhen Sam Sung hrôih iung jang pơm tơlĕch dơ̆ng đơ̆ng rŏng mĭnh khei ‘năr hơnĭh jang kmăi kmŏk pơdơ̆h bơ̆ jang vă tang găn jĭ. Kơ iĕng Thủ tướng pơkă athei rim dêh char, pơlei tơm dăr lăng kơ jăp tơring đei jĭ ‘nao păng dôm kŏng nhân đơ̆ng tơring đei jĭ brŏk vĭh tơ̆ ŭnh hnam.

Tơblơ̆ nơ̆r: Amazưt