VOV4.Bahnar - Lăp đơ̆ng rŏng đei băt mĭnh ƀar ‘nu bơngai hlôi tôm ăn oei hơdrô̆ đĭ kơtĕch 14 năr mă lei oei ƀô̆h tơpŏh jĭ SARS covi 2, pơm tơpŏh jĭ; Dơnŏ anĭh tơm vei lăng jang pơgang sơkơ̆t hơdăh pơđunh dơ̆ng khei ‘năr ăn oei hơdrô̆ akŏm. ‘Nau nơ̆r pơma lơ̆m hla bơar tơchơ̆t kăl ‘nao đei Hơnĭh jang Pơgang tang găn pơrang jĭ pơtrŭh ăn Hơnĭh tơm vei lăng năng tông jĭ jăn rim dêh char, pơlei tơm. Kiơ̆ kơ ‘nŏh, jang kiơ̆ nơ̆r pơrô̆ jang đơ̆ng Kơ iĕng Thủ tướng Teh đak - Kơdră chĕp pơgơ̆r Dơnŏ anĭh pơrô̆ jang tĕh đak tang găn jĭ Covid-19 găh Dơnŏ anĭh tơm vei lăng jang pơgang athei rim dêh char, pơlei tơm tim mă drơ̆ng nơ̆r pơtôch khei ‘năr păng ăn asong lĕch vĕh đơ̆ng hơnĭh ăn oei hơdrô̆ akŏm hăm đĭ đăng dôm bơngai đei tôm tơdrong tơchơ̆t đĭ khei ‘năr ăn oei hơdrô̆ (‘nŏh jing hlôi oei hơdrô̆ đĭ kơtĕch 14 năr, khăm lăng hơlen 2 ‘măng pă đei ƀô̆h sơmach jĭ). Khei ‘năr đei jang kiơ̆ đơ̆ng Tŏk bŏk măng au năr 4/5 dĭng trŭh đei nơ̆r tơroi tơbăt ‘nao đơ̆ng Dơnŏ anĭh chĕp pơgơ̆r Tĕh đak tang găn jĭ Covid-19.

Tơblơ̆ nơ̆r: Amazưt